Nudda Heimi upp úr um­mælum hans eftir tapið sára

Tékkar höfðu haft heppnina með sér og dregist á heimavöll en Írar byrjuðu leikinn frábærlega og komust í 2-0. Tékkar náðu að jafna, 2-2, rétt fyrir lok venjulegs leiktíma og unnu svo í vítaspyrnukeppni, 4-3.

Þrjár fyrstu vítaspyrnur Íra fóru í markið en Caoimhin Kelleher, lærisveinn Guðmundar Hreiðarssonar markmannsþjálfara, varði þriðju spyrnu Tékka. Tvær síðustu spyrnur Íra voru hins vegar líka varðar og þar með féll Írland úr leik.

Miðillinn vinsæli The Athletic birti færslu eftir leik þar sem rifjuð voru upp ummæli Heimis um mögulega vítaspyrnukeppni, í aðdraganda leiksins.

Heimir hafði verið spurður út í það hvort menn æfðu vítin og svaraði:

„Ég er ekki viss um að við græðum svo mikið á því að æfa víti, sérstaklega á þeim stutta tíma sem við höfum. Aðrir hlutir eru mikilvægari,“ sagði Heimir.

Eyjamaðurinn fékk mikið hrós fyrir að koma Írum í þá stöðu að geta tekið þátt í HM-umspilinu og fyrr í þessum mánuði skrifaði hann undir nýjan samning við írska knattspyrnusambandið, um að stýra Írlandi fram yfir Evrópumótið 2028 sem meðal annars fer fram á Írlandi.