Steinar Kaldal: Við duttum, misstum ísöxina og kúturinn kláraðist

Ármann vann þrjá síðustu leiki sína í deildinni og tókst að halda sæti í Bónusdeild karla fyrir 2026-27 tímabilið.

„Okkur líður auðvitað bara stórkostlega, það er mikill fögnuður. Ég er að reyna að setja þetta í eitthvað samhengi. Ég hef unnið Íslandsmeistaratitla með KR en þessi tilfinning er bara annað,“ sagði Steinar.

Ármann, þið eruð með lítið súrefni í kútnum

„Ég var að hugsa þetta á leiðinni í leikinn. Ármann var svolítið eins og fjallgöngugarpur í grunnbúðum Everest með ellefu öðrum. Það var sagt að núna eigi allir að komast upp á topp, en Ármann, þið eruð með lítið súrefni í kútnum. Okei við vissum það, alvöru trú og við höldum áfram.,“ sagði Steinar.

„Við duttum, misstum ísöxina og kúturinn kláraðist. Það er bara viljinn í þessum strákum sem skilaði okkur með hinum níu á toppinn. Það er bara sú tilfinning. Menn héldu að við værum bara að gutla á Esjunni í gúmmístígvélum,“ sagði Steinar.

Ég er bara mjög hátt uppi

„Eins og þið heyrið þá er ég bara mjög hátt uppi, hrikalega glaður og stoltur af strákunum. Stuðningsmennirnir sem mættu og stjórnin, bara takk. Svona lítill klúbbur sem er búinn að taka svona hröð skref er bara mjög gaman að taka þátt í,“ sagði Steinar.

Það var auðvitað annar leikur sem gat haft áhrif á niðurstöðuna í kvöld þar sem Grindavík mætti Þór Þorlákshöfn. Þeim leik lauk með sigri Grindavíkur töluvert áður en leikurinn kláraðist á Akranesi.

„Ég bað strákana um að vera bara í núinu og ekkert að pæla í hinum leiknum. Við vildum vinna. Oddur aðstoðarþjálfari var með síma og lét mig vita þegar það voru þrjár mínútur eftir af okkar leik að Grindavík væri búið að tryggja sinn sigur. Svo ég vissi það þá. Ég var samt bara einhvern veginn áfram einbeittur á að vinna þennan leik. Við vildum klára með sigri,“ sagði þjálfari Ármanns.

Það er risastórt

Sigurviljinn skein í gegn undir lokin hjá gestunum sem höfðu fyrir leikinn unnið tvo leiki í röð.

„Það er risastórt „statement“ að klára tímabilið með þremur sigrum í röð og taka lokasprettinn. Eins og ég kom inn á áðan þá er það þessi vilji og þessi trú í þessum strákum og ákveðið æðruleysi líka í gegnum allan súrefnisskortinn sem við glímdum við. Að klára þetta svona er yndislegt,“ sagði Steinar að lokum.