Gunnar Smári lagstur í sjúkrarúm Maríu Lilju

„Þá er maður aftur kominn á hjarta­deildina, ekkert al­var­legt, bara eitt­hvert bak­slag í lyfja­með­ferðinni, líkaminn ekki sáttur. Það er því útséð um að ég verði með viðtöl á Sam­stöðinni fyrir páska,“ skrifaði Gunnar Smári á Face­book í morgun.

Gunnar Smári hefur undan­farið glímt við al­var­leg veikindi, með blóðtappa í fæti, lungum og hjarta, og fjar­vera hans hefur verið til­finnan­leg í dag­skrá Sam­stöðvarinnar. Þar var hann nýbyrjaður að láta að sér kveða aftur en verður úr því sem komið er fjarri góðu gamni fram yfir páska.

María Lilja hefur, ekki síður en Gunnar Smári, verið áberandi í þáttum Sam­stöðvarinnar en þurfti að hverfa af velli í árs­byrjun vegna dular­fullra veikinda sem enduðu með dvöl á hjarta­deildinni.

Gunnar Smári upp­lýsir að hún hafi út­skrifast fyrir helgi og hann hafi tekið við rúmi hennar. „Saman höfum við meira og minna haldið einu rúmi á hjarta­deildinni síðan fyrir jól. Það er því mikið álag á þeim sem eftir eru, uppi­standandi af starfs­fólki Sam­stöðvarinnar, ég bið ykkur um að biðja fyrir því góða fólki. Og kannski að gerast áskrif­endur, til að hjálpa okkur yfir þennan hjall.“