„Af því að hann er bara miklu betri körfuboltamaður“

Jeremy Pargo var með 24 stig og 8 stoðsendingar í fyrsta leik þar sem Grindavík vann sex stiga útisigur á Keflavík. Kanaskipti Grindavíkur voru til umræðu í Körfuboltakvöldi.

„Ég var nánast búinn að afskrifa Grindavík með Shabazz en ég veit ekki hvort það séu allir sammála því. Þeir taka þessa áhættu og eftir því sem maður sér í kvöld var þetta hárrétt ákvörðun hjá Grindavík. Þeir eiga miklu meiri möguleika með Pargo en með Shabazz,“ sagði Teitur Örlygsson, sérfræðingur í Bónus Körfuboltakvöldi.

„Af hverju er það,“ spurði Stefán Árni.

„Af því að hann er bara miklu betri körfuboltamaður. Við sjáum það kannski ekkert á tölunum en þegar ég horfi á hann þá skil ég bara af hverju þessi gæi var að spila bara í NBA ár eftir ár. Þetta er bara allt annar gæðaflokkur,“ sagði Teitur.

„Pargo sem leikmaður er náttúrulega bara hágæðaleikmaður. Ég hef ekki áhyggjur af að hann sé ekki nógu góður heldur bara verandi sjálfur búinn að vera með menn sem eru komnir yfir besta aldurinn,“ sagði Benedikt Guðmundsson og nefndi leikmenn sem spiluðu hjá honum í Njarðvík eins og þá Fotios Lampropoulos og Nicolas Richotti.

„Um leið og farið er að spila tvisvar til þrisvar í viku þá á bara eftir að reyna á hann og hvort að hann höndli það, nái að halda sér heilum. Skrokkurinn hjá honum er allt öðruvísi heldur en 29 ára skrokkur,“ sagði Benedikt Guðmundsson.

„Já, og skrokkurinn hans hélt ekki á síðasta tímabili,“ sagði Stefán Árni.

„Nei en ég vona innilega að það geri það. Þetta er frábær leikmaður og frábær leikstjórnandi. Það kann enginn leikinn betur í deildinni heldur en Jeremy Pargo. Þetta er virkilega jákvætt fyrir Grindavík í kvöld en það kemur síðan ekkert í ljós bara fyrr en á reynir í úrslitakeppninni og hversu langt þeir fara, hvort þetta hafi verið góð skipti eða ekki,“ sagði Benedikt.

Það má horfa á alla umræðuna um kanaskipti Grindvíkinga hér fyrir ofan.