Bragðgott quesadilla á einni plötu

Svava Marín Óskarsdóttir skrifar 28. október 2025 17:02

Hildur Rut deilir fjölda girnilegra rétta á vefsíðunni Gerum daginn girnilegan og á Instagram-síðu sinni.

Matgæðingurinn Hildur Rut Ingimarsdóttir deilir hér bragðgóðum mexíkóskum rétti sem hentar fyrir alla fjölskylduna. Rétturinn er einfaldur og fljótlegur í undirbúningi þar sem öll hráefnin fara á eina plötu og inn í ofn.

Rétturinn samanstendur af stökkum tortilla-kökum, hakki og fersku grænmeti. Að lokum er hann toppaður með sýrðum rjóma og kóríander.

BBQ-quesadillas á einni plötu

Hráefni:

500 g nautahakk
1 stk meðalstór laukur, saxaður
1 stk ferskt chili, saxað (eða smá chiliflögur)
1 1/2 dl Hunts BBQ sósa
2 dl smátt skornir tómatar
200 g rifinn cheddar ostur
8 stk stórar tortilla kökur
ólífuolía til penslunar
salt og pipar

Til að toppa:

Sýrður rjómi
1 stk avókadó, skorið í sneiðar
Ferskt kóríander
Límóna
Ferskt chili í sneiðum (má sleppa)

Aðferð:

Hitið ofninn í 200°C og klæðið ofnplötu með bökunarpappír.
Steikið nautahakkið á pönnu þar til það er brúnað. Bætið lauk og chili út á pönnuna og steikið áfram í nokkrar mínútur þar til laukurinn mýkist.
Hellið Hunts BBQ-sósunni út í og hrærið vel saman. Smakkið til með salti og pipar.
Leggið 7-8 tortillur á bökunarplötu þakta bökunarpappír þannig að þær liggi aðeins yfir hvor aðra. Þetta á að mynda botninn.
Dreifið nautahakksblöndunni yfir botninn, smátt skornum tómötum og rifnum cheddar osti yfir.
Leggið restina af tortillunum (ég notaði eina) í miðjuna ofan á sem lok og brjótið brúnirnar inn þannig að þær hylji fyllinguna. Penslið toppinn með ólífuolíu.
Bakið í 20–25 mínútur eða þar til toppurinn er gullinbrúnn og stökkur.
Skerið sneiðar og berið fram með sýrðum rjóma, avókadó, fersku salati, kóríander, lime og chili og njótið vel.

Aðferðina má sjá í myndbandinu hér að neðan