Víkingur mætir lík­lega Bröndby ef liðið kemst á­fram

Þeir spila á fimmtudag við albanska liðið Skhoder og takist Víkingi að komast áfram mæta þeir væntanlega danska stórliðinu Bröndby.

Bröndby er að spila við færeyska liðið HB og má fastlega gera ráð fyrir því að Bröndby fari áfram þó svo færeysku liðin séu að standa sig vel í Evrópu.

KA mætir Silkeborg í Danmörku á morgun og ef liðið kemst áfram er næsti andstæðingur annað hvort Novi Pazar frá Serbíu eða Jagielloina frá Póllandi.

Valur er að spila við Zalgiris og fær Arda Kardzhali frá Búlgaríu eða HJK frá Helsinki ef topplið Bestu deildarinnar kemst áfram.

Það var einnig dregið í Meistaradeildinni þar sem Breiðablik er að keppa. Ef liðið kemst áfram gegn Lech Poznan þá bíður liðsins rimma gegn annað hvort Lincoln Red Imps frá Gíbraltar eða gegn Rauða stjörnunni frá Serbíu.

Ef Blikarnir tapa þá færast þeir niður í Sambandsdeildina. Blikarnir munu þá spila gegn annað hvort Slovan Bratislava frá Slóvakíu eða gegn Zrinjski Mostar frá Bosníu.