Kríla­eggið er nýjasta páska­eggið frá Freyju

„Hjá fjölskyldum er undirbúningurinn stór partur af upplifuninni, hvort sem það er biðin, að undirbúa ratleik eða finna góðan felustað,“ segir Pétur Thor Gunnarsson, framkvæmdastjóri sælgætisgerðarinnar Freyju. „Hjá öðrum er páskaeggjasmakk með vinum og vinnufélögum fyrir sjálfa páskana orðið vinsælt, svo getur komið upp mjög tilfinningalega þrungin umræða í kringum hvernig skuli opna páskaegg.“

Smekkur landsmanna er í stöðugri þróun segir Pétur. „Sælgætisgerðin Freyja var frumkvöðull að því að bæta við sælgæti í súkkulaðiskelina á íslenskum markaði. Þegar Freyju Rísegg leit dagsins ljós árið 2005 var það algjörlega nýtt. Núna sjáum við árlega mikla aukningu í sölu á páskaeggjum með sælgæti í súkkulaðiskelinni og koma nýjungar í þeim efnum á hverju ári.“

Málshátturinn er þó sú hefð sem hefur haldist nánast óbreytt frá upphafi en Íslendingar leyfa sér að láta bragðið ráða för við val á páskaeggi. „Páskarnir skipa stóran part af starfsemi okkar hjá Freyju, í aðdraganda er alltaf mikið líf og fjör hér innanhúss enda er hlutverk okkar að skapa bragðgóðar íslenskar minningar með þjóðinni.“

Óþreytandi bjartsýni – en ekki gott að bíða of lengi

„Þjóðarsálin hjá okkur Íslendingum er mjög nýjungagjörn og við erum það líka hér í Freyju þrátt fyrir að halda fast í ákveðnar hefðir og framleiðsluaðferðir, þá þykir okkur virkilega gaman að þróa og setja á markað ný páskaegg.“

Í ár er nýjungin frá Freyju Krílaegg. „Það er lítið egg á fæti sem er ævintýralega sætt. Súkkulaðiskelin er fyllt með litríkum súkkulaðiperlum og er eggið sjálft að sjálfsögðu fyllt með Freyju sælgæti og málshætti. Þetta er fyrsta litla eggið á fæti þar sem súkkulaðiskelin er með sælgæti. Krílaeggið er tilvalið fyrir páskaeggjaleit, fyrir þá sem vilja taka forskot á páskasæluna eða einfaldlega til þess að njóta í hófi.“

Freyja er elsta starfandi sælgætisgerð á Íslandi en hún var stofnuð af Íslendingum sem voru fullir af óþreytandi bjartsýni árið 1918 á sögulegum en mjög krefjandi tíma. „Á þessum tíma var Ísland að öðlast sjálfstæði frá Danmörku, Spænska veikin gekk yfir Reykjavík, fyrri heimsstyrjöldinni var að ljúka og ofan á allt gaus ein stærsta eldstöð landsins, Katla. Þetta lýsir vel þjóðarsálinni, að láta sér detta í hug að setja á fót sælgætisgerð á miklum umbrotatímum í íslenskri sögu.“

Enn þann dag í dag er menningin hjá Freyju full af óþreytandi sér íslenskri bjartsýni segir Pétur. „Í vöruþróunarferli á nýjum páskaeggjum koma oft á tíðum upp hnökrar, þá gefumst við aldrei upp fyrr en við höfum náð réttum gæðum. Núna hefur úrvalið frá Freyju aldrei verið breiðara, en vinsælust eru alltaf Rís- og Draumaeggin. Þar fast á eftir fylgja Djúpueggin, Bombueggin, Saltkaramellueggið og Fjöreggið.

Eigi fólk sér uppáhalds páskaegg mælum við með því að tryggja sér það tímanlega því sumar tegundir seljast einfaldlega upp. Í þeim málum þýðir ekki að vera yfir sig bjartsýnn að finna allar tegundir á sjálfan Páskadag.“