Lands­lið tón­listar­manna mætti þegar Maggi Ei­ríks var hylltur

Fram kemur í tilkynningu frá viðskipta-og menningarmálaráðuneytinu að einstök stemming hafi myndast á tónleikunum þar sem gestir risu úr sæti og fögnuðu Magnúsi og íslensku tónlistarlífi. Magnús þakkaði sjálfur fyrir allt það góða tónlistarfólk sem hefur fylgt honum á ferlinum, eins og hann orðaði það sjálfur: „Og komið mér í stúdíó“ og vísaði þar til þeirra fjölmörgu vina sinna sem heiðruðu hann í gærkvöldi með flutning á lögum hans. 

Meðal þeirra var KK en þeir félagar hafa spilað saman í 28 ár en auk hans komu fram Ragga Gísla, Pálmi Gunnarsson, Ellen Kristjánsdóttir og dætur hennar Elísabet, Sigríður og Elín Eyþórsdætur, Mugison, Bríet, Valdimar, Salka Sól og Jón Jónsson. Einvala lið hljóðfæraleikara undir styrkri stjórn Eyþórs Gunnarssonar fór á kostum en þar á meðal voru synir Magnúsar þeir Stefán Magnússon gítarleikari og Stefán Stefánsson trommari.

Hluti íslenskrar þjóðarsálar

Saga tónlistarmannsins Magnúsar Eiríkssonar spannar marga áratugi og ótrúlegan fjölda hugverka og hljóðrita. Einlægni er Magnúsi Eiríkssyni eðlislæg auk þess hve lagræn og sönghæf lögin hafa verið frá fyrstu tíð. Textarnir hitta jafnan beint í mark og falla svo vel að laglínunum að úr verða fullkomnar samfellur. Lög Magnúsar eru órjúfanlegur hluti íslenskrar þjóðarsálar og menningararfs. Ferill Magnúsar Eiríkssonar spannar allt frá árdögum blúsvakningarinnar á Íslandi og vindur fram í gegnum sögu hljómsveitanna Blús kompanís, Pónik, Skuggasveina, Lísu í Undralandi, Brunaliðsins og svo Mannakorna, auk fjölmargra annarra verkefna.

„Maggi Eiríks, eins og þjóðin þekkir hann, er ekki bara iðinn og fær tónlistarmaður heldur hefur fjölbreytni hans gefið íslensku þjóðinni marga dýrgripi og fyllt fjöldann allan af listafólki innblæstri. Laga- og textasmiðnum, gítarleikaranum og söngvaranum Magga Eiríks eru færðar þakkir frá okkur öllum og um leið vil ég þakka öllu því stórbrotna tónlistarfólki sem flutti lög Magnúsar. Ég fyllist enn á ný lotningu yfir þeim fjársjóði sem listafólkið okkar er. Takk Maggi og takk íslensk tónlist!“ segir Lilja Dögg Alfreðsdóttir menningar- og viðskiptaráðherra.

Árlegur viðburður

Tónlistarráð var skipað í haust samkvæmt nýjum tónlistarlögum og var ráðinu meðal annars falið að móta nýja hugmynd að sérstökum heiðursverðlaunum til þess að fagna sköpunarkrafti og ævistarfi íslensks tónlistarmanns eða tónlistarhóps og þakka með þeim hætti fyrir framlag viðkomandi til íslensks tónlistarlífs.

„Það þarf ekki að koma neinum á óvart að nafn Magnúsar Eiríkssonar hafi þegar á fyrstu metrum undirbúnings ítrekað borið á góma. Þegar horft var til bæði lagasmíða, textasmíða, lifandi flutnings og upptökustjórnar hljóðritunarferlisins, reyndist Tónlistarráðið einróma í þeirri niðurstöðu að Magnús Eiríksson skyldi fyrstur hljóta hin nýju heiðursverðlaun,“ segir Jakob Frímann Magnússon formaður Tónlistarráðs.

Tónlistarráð sammæltist um að hin nýju verðlaun skyldu nefnd Þakkarorða íslenskrar tónlistar og verða afhent árlega á Degi íslenskrar tónlistar sem jafnan ber upp á fullveldisdaginn 1. desember. Þakkarorða íslenskrar tónlistar er samstarfsverkefni Tónlistarráðs, menningar- og viðskiptaráðuneytisins, Tónlistarmiðstöðvar, Hörpu og RÚV.