Hörður Axel hefur skorað sjö þriggja stiga körfur í fyrstu þremur leikjunum þar af komu fjórar þeirra í síðasta leik á móti Val.
Hann hefur þar með skorað 595 þrista samanlagt í 276 leikjum sínum í úrvalsdeild og með því náði hann að jafna við Loga Gunnarsson á listanum yfir flesta þriggja stiga körfur í deildarleikjum.
Logi skoraði sína 595 þrista í 291 leik eða í fleiri leikjum en Hörður. Hörður er með 2,15 þrista í leik en Logi er með 2,0 þrista í leik.
Hörður Axel byrjaði tímabilið í ellefta sæti listans en er nú kominn upp í sjöunda sætið við hlið Loga. Gunnar Einarsson var sá sem datt út af topp tíu listanum.
Með því að skora fjóra þrista á móti Íslandsmeisturum Vals þá náði Hörður því í 53. sinn að skora fjóra þrista eða fleiri í einum leik.
Hann hefur mest skorað fimm þrista í einum leik með Álftanesi en persónulega metið hans eru átta þristar í leik með Keflavík á móti Snæfelli í nóvember 2008.
- Flestar þriggja stiga körfur í úrvalsdeild karla:
- 1. Páll Axel Vilbergsson 1038 þristar
- 2. Guðjón Skúlason 965 þristar
- 3. Brynjar Þór Björnsson 872
- 4. Magnús Þór Gunnarsson 867
- 5. Teitur Örlygsson 742
- 6. Kristinn Friðriksson 675
- 7. Hörður Axel Vilhjálmsson 595
- 7. Logi Gunnarsson 595
- 9. Guðmundur Jónsson 594
- 10. Valur Ingimundarson 593