Afhöfðaður sex dögum eftir em­bættis­töku

Þá hefur glæpastarfsemi einnig verið gífurlegt vandamál í Chilpancingo, sem er höfuðborg Guerrero-héraðs, en í fyrra héldu hundruð þungvopnaðra glæpamanna mótmæli í borginni, rændu brynvörðum bíl og tóku lögregluþjóna í gíslingu, þar til vinum þeirra var sleppt úr haldi lögreglunnar, samkvæmt AP fréttaveitunni.

Reuters segir Arcos hafa farið úr borginni á fund, áður en hann var myrtur. Hann hafi verið einn á ferð og á sunnudaginn hafi svo myndir verið birtar á samfélagsmiðlum sem hafi sýnt höfuð hans á þaki pallbíls.

Skömmu áður hafði Arcos sagt í viðtali að hann vildi aukna öryggisgæslu en hann hafði ekki farið fram á hana formlega. Eftir að hann var myrtur hafa að minnsta kosti fjórir aðrir borgarstjórar í Guerrero og í nærliggjandi héraði sem heitir Guanajuato farið fram á aukna öryggisgæslu.

Omar Garcia Harfuch, öryggismálaráðherra Mexíkó, segir að borgarstjórarnir geti fengið brynvarða bíla, fleiri lífverði og viðvörunarkerfi frá ríkinu. Ráðherrann vildi ekki segja á blaðamannafundi í dag hvern Arcos hefði hitt á áðurnefndum fundi.

Morðið væri til rannsóknar og ekki væri hægt að veita frekari upplýsingar að svo stöddu.

Ástandið slæmt víða og blóðugar kosningar

Öryggisástandið í Guanajuato þykir sérstaklega slæmt en fyrir kosningar í júní voru fjórir frambjóðendur til borgarstjóra myrtir. Glæpagengi ganga á frambjóðendur, borgarstjóra og embættismenn og kúga þá meðal annars til að greiða verndunargjald, gera opinbera samninga við glæpagengin og til að skipa glæpamenn í embætti innan lögreglunnar.

Kosningarnar í sumar þóttu sérstaklega blóðugar víða um Mexíkó.

Claudia Sheinbaum, nýkjörinn forseti Mexíkó, ætlar á næstu dögum að kynna áætlun sína til að draga úr ofbeldi í Mexíkó.

Glæpamenn í Mexíkó eru margir hverjir mjög vel vopnum búnir. Í mjög einföldu máli sagt hafa glæpagengi þar í landi lengi flutt mikið magn fíkniefna víða um heim og þá sérstaklega til Bandaríkjanna. Frá Bandaríkjunum fá þeir mikið magn peninga fyrir þessi fíkniefni og eru þeir peningar meðal annars notaðir til að kaupa gífurlegt magn skotvopna í Bandaríkjunum og flytja þau til Mexíkó.

Yfirvöld í Mexíkó hafa reynt að höfða mál gegn bandarískum skotvopnaframleiðendum til að reyna að sporna gegn þessu flæði vopna suður yfir landamærin en án árangurs. Árið 2021 töldu ráðamenn í Mexíkó að á undangengnum áratug hefðu um 2,5 milljónir skotvopna verið flutt til Mexíkó með ólöglegum hætti.

Sjá einnig: Mexíkóar ætla að höfða mál gegn byssuframleiðendum í Bandaríkjunum

Vopnum þessum er ekki eingöngu beitt gegn öðrum glæpamönnum heldur einnig lögregluþjónum og hermönnum í Mexíkó.