Pétur Jökull er Pj Glaze

Oddur Ævar Gunnarsson skrifar 14. ágúst 2024 13:25

Pétur Jökull Jónasson sætir ákæru fyrir aðild að stóra kókaínmálinu svokallaða og hefur gefið út tónlist undir nafninu Pj Glaze. Vísir/Vilhelm

Pétur Jökull Jónasson sem ákærður er fyrir aðild að innflutningi á tæplega hundrað kílóum af kókaíni og réttað hefur verið yfir síðustu daga í Héraðsdómi Reykjavíkur er líka tónlistarmaður. Hann hefur gefið út raftónlist undir listamannsnafninu Pj Glaze. Þá spilaði hann líka á hljómborð í rafhljómsveitinni Dr. Mister & Mr. Handsome.

Aðalmeðferð í málinu hélt áfram í Héraðsdómi Reykjavíkur í gær. Um er að ræða ákæru á hendur Pétri fyrir innflutning á kókaíni hingað til lands frá Hollandi og Brasilíu sumarið 2022. Hann hefur alfarið neitað sök í málinu.

Pétur hefur gefið út fimm lög undir listamannsnafninu sem öll má finna á streymisveitum líkt og Spotify og Yotube. Fyrsta lagið hét Transhuman og kom út árið 2014.

Þremur árum síðar gaf Pétur út stuttskífuna Royal Pain með fjórum lögum. Samnefndu lagi Royal Pain, Daughter, Late at Night og Gray Days.

Þá var Pétur áður hljómborðsleikari í íslensku rafhljómsveitinni Dr. Mister & Mr. Handsome sem gáfu út sína fyrstu plötu árið 2006. Sveitin sagði í samtali við Morgunblaðið við tilefnið að markmiðið væri að gera grín að Scooter og klúbbamenningu en Pétur gekk undir nafninu Gentleman í sveitinni.

Sjá má á Youtube síðu Péturs að hann er mikill aðdáandi raftónlistar en þar hefur hann valið nokkur af sínum uppáhaldslögum og raðað á sérstakan lista. Þar má að mestu finna lög í svokölluðum house stíl en einnig lög eftir tónlistarmenn eins og Lönu Del Rey og Juicy J.

Tónlist Stóra kókaínmálið 2022