„Ó­menntaður kúka kennslu sóði!“

Flest viðbrögð sem ég fékk voru nokkuð góð, en svo var ein manneskja sem var nú ekki alveg sammála. Hún bæði sendi mér skilaboð og deildi pistlinum á vegginn hjá sér (þakka henni hér með fyrir að deila kynfræðslunni!). Samhliða því að deila pistlinum kallaði hún mig meðal annars „ómenntaðann kúka kennslu sóða”.

Í skilaboðunum og því sem hún skrifaði sá ég augljósan ótta. Veit nú ekki hvað liggur að baki þessum ótta. Kannski er hann byggður á fordómum, skorti á upplýsingum og/eða rangfærslum. Kannski er óttinn byggður á sögum af fólki sem fékk einmitt ekki fræðslu um hvernig má stunda hina ýmsu kynhegðun á öruggari hátt.

En áður en sú sem kallaði mig „ómenntaðann kúka-kennslu-sóða” hafði ég verið kölluð „miðaldra klámkerling” í kommentakerfinu og finnst þetta því ágætis uppfærsla frá því. Enda aðeins 31 árs og frekar mikið högg að vera kölluð miðaldra, hélt ég ætti nokkur ár í það!

Ég verð samt að fá að leiðrétta að vera kölluð ómenntuð. Þó námið mitt hafi ekki falið í sér ítarlega „kúkakennslu” per se, þá er ég með meistarapróf í kennslufræðum í kynfræði (e. sexology). Kynfræði er sú fræðigrein sem rannsakar, fræðir og veitir ráðgjöf um allt því sem viðkemur að vera kynvera á heildrænan hátt og er því um þverfaglega grein að ræða sem fjallar um andlega, líkamlega og félagslega þætti. Því er ég bara nokkuð menntuð í að fræða og ræða um hina ýmsu kynhegðun, líkt og endaþarmsmök.

Það eru margar leiðir sem fólk getur farið til að verða kynfræðingar. Til þess þarf að taka meistaranám í kynfræði, sem því miður er ekki kennt á Íslandi en er kennt víðs vegar erlendis.

Kannski eru fleiri sem langar að vera „kúka kennslu sóðar” og ætla ég því aðeins að lýsa hvaða leið ég fór, sem er jú ein af mörgum leiðum en getur gefið ágæta hugmynd um hvernig þú getur látið drauminn um að vera kallaður „sóði” eða „klámkerling” í kommentakerfinu verða að veruleika!

Þar sem flestir háskólar gera kröfu um grunnnám á háskólastigi áður en haldið er í meistaranám tók ég BSc próf við sálfræði í Háskólanum í Reykjavík. Áður en ég fór í sálfræðinámið kynntist ég Siggu Dögg, kynfræðingi, við gerð þáttanna Tveir plús Sex sem sýndir voru á Stöð 2 á sínum tíma.

Þá bauð Sigga Dögg mig velkomna í Kynfræðifélag Íslands, þar sem ég bauð mig svo fram í stjórn og hef verið í síðan árið 2014. Það er frábært að fá að vera hluti af félaginu, ég fékk t.d. meiri innsýn í störf kynfræðinga og hjá fleirum sem starfa á því sviði. Það hefur alltaf verið fjölbreyttur hópur fólks í stjórn og alls ekki öll sem eru kynfræðingar. Að vera í félaginu hélt mér líka ágætlega við efnið og markmiðið að verða kynfræðingur!

Við lok sálfræðinámsins rannsakaði ég svo sjálfsfróun kvenna og tengsl við líkamsímynd, sjálfstraust og ánægju í kynlífi. Eftir námið var ég búin að finna þann háskóla sem ég vildi lærakynfræðina. Þegar fólk velur sér nám í kynfræði, þarf að hafa í huga hvort það stefnir á kynfræðslu, kynlífsráðgjöf eða rannsóknir.

Ég stefndi á kynfræðsluna og fór til Bandaríkjanna í Widener University rétt fyrir utan borgina Fíladelfíu. Þar fór ég í tveggja ára meistaranám í kennslufræðum í kynfræðslu.

Þar er líka hægt að læra kynlífsráðgjöf, en þá þarf að hafa lokið námi sem veitir réttindi til að veita meðferð á Íslandi, til dæmis klíníska sálfræði, félagsráðgjöf, hjúkrunarfræði eða fjölskylduráðgjöf. Ef fólk er ekki búið með það nám er möguleiki á að ljúka við tvær gráður í einu; kynlífsráðgjöf og samhliða því klíník í sálfræði eða félagsráðgjöf. Ég mæli þó með að fólk kynni sér hvort námið sem það stefnir á erlendis sé viðurkennt til starfsréttinda á Íslandi.

Kynfræði er líka kennd víðsvegar um heiminn, en þar sem ég er bandarískur ríkisborgari fannst mér mjög hentugt að fara til Bandaríkjanna og þurfa ekki að læra nýtt tungumál áður en ég fór í námið.

Þá veit ég að t.a.m. Sigga Dögg og Áslaug Kristjáns kynfræðingar fóru til Ástralíu í nám, þar er jú töluð enska líka. En mér fannst Fíladelfía borgin, þar sem Widener háskólinn er rétt hjá, líka þægilega nálægt Íslandi. Reyndar er ég líka sjúklega hrædd við kóngulær og þær eru víst sumar hættulegar þarna hinum megin á hnettinum.

Ég útskrifaðist árið 2020 sem kynfræðingur og hef verið sjálfstætt starfandi kynfræðingur síðan þá. Ég byrjaði þó að vísu að fara með fræðslu um sjálfsfróun fyrir ýmsa hópa árið 2016 þegar ég kláraði sálfræðinámið og styttist því í áratugar reynslu af kynfræðslu víðs vegar um landið.

Við erum ekki nema fimm menntaðir kynfræðingar hér á Íslandi og því erum við sem störfum á sviðinu alltaf að reyna fá fleiri í fagið! Eins og ég nefndiveru fjölmargar leiðir til að læra fagið. Aldís Þorbjörg sálfræðingur fór til dæmis þá leið að eftir að hafa lokið námi í klínískri sálfræði sótti hún sér viðbótardiplómu í kynlífsráðgjöf við háskólann í Michiganríki og gat stundað það nám að hluta til í fjarnámi með staðarlotum.

Ef þú hefur áhuga á kynfræðinámi, hefur fleiri spurningar eða pælingar, ekki hika við að senda mér línu í gegnum heimasíðuna mína eða t.d. á: Instagram.com/indianaros6.