Fullur til­hlökkunar fyrir nýjum kafla

Hér má sjá tónlistarmyndbandið:

Floni skaust upp á stjörnuhimininn árið 2017 þegar að hann gaf út sitt fyrsta lag Tala saman. Floni var mjög virkur í tónlistarlífinu og sendi frá sér fjölda smella en lítið hefur heyrst frá kappanum síðan 2021.

Nýtt tímabil

„Í febrúar síðastliðnum tilkynnti Floni að hann hefði skrifað undir nýjan samning við útgáfurisann Sony Music og gaf hann einnig út fyrstu smáskífuna af væntanlegri plötu sinni Flona 3. Smáskífan ber heitið Engill og hefur notið mikilla vinsælda frá útgáfu. Í gær gaf Floni svo út tónlistarmyndband við lagið í leikstjórn Einars Egilssonar,“ segir í fréttatilkynningu.

Í samtali við listamanninn segir hann að myndbandið hafi verið unnið í Covid og þá við allt annað lag. Hann og leikstjórinn ákváðu svo að myndbandið hentaði laginu Engill mun betur.

„Þetta var mjög skemmtilegt ferli og forréttindi að fá að vinna með Einari að þessu myndbandi. Ég hef alltaf verið hrifinn af því að skapa sjónrænan heim í kringum tónlistina mína og finnst mér þetta myndband ná vel utan um orkuna í laginu,“ segir Floni.

Næsti kafli tekur við

Myndbandið er framleitt af framleiðslufyrirtækinu Empathy & Indy af þeim Einar Egilssyni og Atla Óskari Fjalarssyni. Aðspurður segir Floni að nóg sé í vændum og að aðdáendur hans munu ekki þurfa að bíða lengi eftir frekari fregnum.

„Núna vorum við að loka þessum fyrsta kafla og næsti kafli tekur við. Nýr síngúll er væntanlegur í apríl. Það er mikil stemning og það er alltaf gaman að gefa út. Sérstaklega eftir Covid lægðina, það er gaman að allt sé að fara á fullt. 

Ég finn svo sterkt fyrir því hvað mér finnst skemmtilegt að gefa út músík og ég vona að allir séu glaðir með þetta. Ég er svo mjög spenntur að gefa út plötuna en útgáfudagur er enn þá leyndarmál. Þangað til fær fólk snefil af því sem koma skal með nokkrum sínglum.“

Hér má sjá myndbandið á Youtube.