Súrsætur og elegant eftir­réttur

Skyr með hvítu súkkulaði og sítrónusmjöri – fyrir 6 –

Hráefni:

150 g LU kex

50 ml mjólk

100 g hvítt súkkulaði

1 tsk vanilludropar

500 g vanilluskyr

Aðferð:

Myljið kexið í matvinnsluvél eða í poka og með kökukefli. Dreifið í botn á sex skálum.

Setjið mjólk og súkkulaði saman í skál og bræðið í örbylgjuofni eða yfir vatnsbaði þangað til það er bráðið. Bætið vanilludropum saman við og leyfið kólna lítillega.

Setjið saman í skál súkkulaðiblönduna og skyrið og hrærið vel saman.

Gott er að hella í sprautupoka og þannig í glösin, hellið jafnt í glösin.

Setjið inn í kæli og kælið í 2-3 klst.

Sítrónusmjör

Hráefni:

40 g sítrónusafi

1 tsk sítrónubörkur

20 g smjör, við stofuhita

1 egg, við stofuhita

1 eggjarauða

55 g sykur

Aðferð:

Allt sett í blandara og blandað saman þangað til að öll hráefnin hafa blandast vel saman, það á það til að skilja sig í upphafi þá er bara að halda áfram að blanda þangað til allt er rennislétt.

Þá er blandan sett í pott á lágan hita og hrært í öðru hverju.

Eftir smá tíma fara að myndast þykkar búbblur sem segir til að það er byrjað að þykkna, hrærið aðeins og takið svo af hellunni og hellið í hreint ílát og leyfið að kólna.

Svisssneskur marengs

Hráefni:

2 eggjahvítur

½ tsk cream of tartar

100 g sykur

1 tsk vanilludropar

klípa af salti

Aðferð:

Öllu blandað saman í skál og sett yfir vatnsbað s.s. pott með vatni í miðlungshita.

Hitið þangað til að blandan er 71°c eða þangað til að þið getið sett dropa á puttann og nuddað saman og þið finnið ekki lengur sykurkorn.

Setjið þá í hrærivél og hrærið þangað til að marengsinn er orðinn stífþeyttur.

Þá er að taka taka skyrið úr kæli. Setjið rúma matskeið í hvert glas og dreifið úr með skeiðinni.

Setjið marengsinn í sprautupoka og sprautið yfir.

Til að gera hann extra fínan er hægt að nota brennara til að brenna hann aðeins.

Skreytið með bláberjum eða því sem ykkur finnst passa með.