Þrátt fyrir að vera orðinn 39 ára gamall virðist ekkert vera að hægjast á markaskorun hjá Ronaldo sem nú er kominn með 43 mörk í 40 deildarleikjum fyrir Al Nassr. Hann kom gestunum í 2-0 með tveimur aukaspyrnumörkum gegn Abha í gær áður en Sadio Mane bætti þriðja markinu við eftir rétt rúmlega hálftíma leik.
Ronaldo fullkomnaði svo þrennuna á 42. mínútu með snyrtilegri vippu áður en hann lagði sjálfur upp fimmta mark Al Nassr tveimur mínútum síðar.
Cristiano Ronaldo completes a first half hattrick with an audacious chip to cap off a dominant Al Nassr showing 🔥 👏
— Roshn Saudi League (@SPL_EN) April 2, 2024
#yallaRSL pic.twitter.com/6uLHlRRJKj
Þeir Ronaldo og Mane voru svo teknir af velli í hálfleik, en gestirnir bættu þremur mörkum við í síðari hálfleik og unnu því að lokum 8-0 risasigur.
Eins og áður segir var þetta annar leikurinn í röð sem Ronaldo skorar þrennu í, en hann gerði það einnig í 5-1 sigri gegn Al Taee síðastliðinn laugardag. Ronaldo hefur nú skorað 65 þrennur á ferlinum og er sá leikmaður sem er enn að spila sem er kominn með flestar þrennur á ferlinum. Lionel Messi kemur næstur með 57 stykki.