Vatna­skóga­strákum barst óvæntur risa styrkur

„Þetta er með betri fréttum sem ég hef fengið,“ segir Nói Pétur, eðli málsins sam­kvæmt kampa­kátur, í sam­tali við Vísi. Eins og fram hefur komið fór hinn 17 ára gamli nemandi af stað með metnaðar­fulla söfnun til handa Vatna­skógi í til­efni af hundrað ára af­mæli þeirra.

Það vakti lands­at­hygli í ágúst þegar Nói gekk úr Reykja­vík í Vatna­skóg, 55 kíló­metra leið, á­samt frændum sínum þeim Kristjáni Daða Runólfs­syni og Örn­ólfi Sveins­syni til styrktar söfnuninni. Um var að ræða sömu leið og fyrst var farin í sumar­búðirnar árið 1923. Nú þegar hafa safnast 6,1 milljón króna en mark­miðið hefur verið að safna 1000 krónum fyrir hvern dag í hundrað ára sögu Vatna­skógar.

Velunnarar Vatna­skógar hafa heitið því að jafna allar þær gjafir sem koma í söfnunina fram að 2. nóvember, allt að fimm milljónum króna. „Fólk getur þannig tvö­faldað hverja krónu sem þau setja í söfnunina, sem er alveg magnað! Feðgar sem hafa oft­sinnis notið góðra stunda í Vatna­skógi vildu láta gott af sér leiða og vonandi hvetja fleiri til að gera það líka,“ segir Nói.

„Við erum með stiku á heima­síðunni söfnunarinnar, www.vatna­skogur100.is sem sýnir hvert við erum komin að hverju sinni. Árin 1923 og fram til 1940 eru klár. Núna fyrr í septem­ber bárust okkur svo þessar frá­bæru fréttir, að jafna ætti allar gjafir út októ­ber!“ segir Nói himinlifandi.

Málið er í raun ein­falt, ef ein­stak­lingur eða fyrir­tæki á­kveður að gefa 1000 krónur, koma þessir velunnarar með 1000 á móti, þannig tvö­faldast hver þúsund­kall Vatna­skógi og hug­sjónunum og krafti staðarins í hag, ef gjöfin er 100.000 krónur koma velunnarnir með aðrar 100.000 krónur á móti og svo fram­vegis. Feðgarnir hafa tekið frá 5 milljónir í verk­efnið. Gjöfin gæti því orðið 10 milljónir!“

Nói segist ekki enn vera farinn að þora að láta sig dreyma um það hvernig hann ætli að halda upp á það í lok árs ef mark­miðið náist. Hann segir verk­efnið snúast um veg­ferðina frekar en á­fanga­staðinn.

„Við gerum þetta vegna þess að við elskum Vatna­skóg. Það gera það líka svo margir og vilja að staðurinn verði á­fram í fullu fjöri eftir hundrað ár. Þess vegna trúi ég því að þetta muni nást.“