Svörtu sandar fengu lof­sam­lega dóma í Wall Street Journal

Gagnrýnandi blaðsins, John Anderson, hrósaði leikurunum og skemmtilegum fléttum og mælti með hámhorfi en serían telur átta þætti.

Baldvin Z, leikstjóri og einn þriggja handritshöfunda seríunnar, var ánægður að lesa þennan jákvæða dóm. „Ég veit í raun ekki mikið um viðtökur, en það litla sem ég veit er gríðarlega jákvætt. En ég er ekki mikið að velta mér upp úr því þessa dagana þar sem öll orkan fer í undirbúning á seríu tvö. Wall Street Journal er mjög stórt blað í Bandaríkjunum, það er það eina sem ég veit. Hins vegar veit ég að Viaplay voru mjög glöð með að fá þessa umfjöllun því það er erfitt að fá svona umfjöllun á erlendum seríum í svona stórum miðli og ekki skemmdi fyrir að umfjöllunin var hrikalega góð.“

Svörtu sandar fjallar um Anítu, þrítuga lögreglukonu, sem neyðist til að sækja æskuslóðirnar heim en þaðan hafði hún flúið fjórtán árum áður. Uppgjöf við móður hennar er óumflýjanlegt en líkfundur breytir öllum plönum hennar. Aníta sogast niður í dimman hyl fortíðar í leit að mögulegum fjöldamorðingja og uppgjörið breytist í martröð. Aldís Amah Hamilton leikur Anítu og í öðrum aðalhlutverkum eru Steinunn Ólína Þorsteinsdóttir og Þór Tulinius. Svörtu sandar var sýnd á Stöð 2 um jólin árið 2021 en Glassriver er framleiðandi seríunnar.

Sería tvö, eða seinni hluti eins og Baldvin kýs að kalla verkefnið, er alveg magnaður lokakafli sögunnar að hans sögn. „Allir sem horfðu og festust við voru með svipaðar spurningar í lok fyrstu seríu. Við munum fá svör við öllum þeim spurningum og meira til og halda áfram látunum á Glerársöndum. Í seinni hlutanum eru þrettán mánuðir liðnir frá harmleiknum í seríu eitt. Aníta er búinn að eignast barn og martröðin byrjar aftur þegar kona stígur fram og sakar frænda hennar Davíð um kynferðislega misnotkun 40 árum áður.“

Líkt og í fyrri seríunni verður spennandi að fylgjast með hverjir lifa og hverjir deyja segir Baldvin. „Því reglan í Svörtu söndum er einföld. Ef eitthvað vont gerist, þá gerist það á eins vondan hátt og hugsast getur. Fjórar risa leikkonur bætast í leikarahópinn, þær Halldóra Geirharðsdóttir, Sólveig Arnarsdóttir, Erla Ruth og Ólafía Hrönn ásamt fleiri frábærum leikurum. Þetta verður veisla.“