Júlíspá Siggu Kling: Þú heldur áfram eins og herforingi

Sigga Kling skrifar 7. júlí 2023 06:00

Elsku vatnsberinn minn, það eru búin að vera mikil tíðindi í kringum þig, áföll og ýmislegt sem þú hefur höndlað misjafnlega. En það sem er að breytast er að þér verður miklu meira sama, lætur ekkert á þig fá í rauninni. Þú heldur áfram eins og herforingi, það er meira segja hægt að segja að það rigni upp í nefið á þér. Þú varst í raun búin að búa þig undir að allt gæti gerst og að margt gæti hrunið í lífi þínu.

Vatnsberinn er frá 20. janúar til 18. febrúar.

Þó að þú þurfir að færa þig aðeins úr stað, flytja, endurskoða það sem þú ert að gera, því það er ekki allt sem sýnist. Þú þarft að sjá vel hvernig þú ætlar að tefla þessa skák. Þetta á sérstaklega við þá sem eru í hárri stöðu því hærra getur fallið orðið, sérstaklega ef þú sýnir hroka og reynir ekki að sjá hlutina í nýju og réttara ljósi. Því að sanngirni og heiðarleiki er akkúrat í raun og veru þú.

Ef þér finnst þú vera í einhverskonar skel eða ekki hafa nógu mikið frelsi þá brýtur þú þér leið. Það er svo merkilegt að það er alveg sama hvaða stöðu þú tekur að þú ert nógu sterkur til að halda henni. Þú munt rífa af þér þau öfl sem reyna að stjórna þér eða setja þér lífsreglurnar því þú nennir ekki að eyða tímanum í svoleiðis vitleysu.

Þú myndar meiriháttar gleði í sálinni þinni því allt er að snúast og þú ert á einskonar hringtorgi það eru margar leiðir út og kannski þarftu að taka tvo þrjá hringi áður en að rétt stefna er tekin. Þú bjóst í raun ekki við því að líða svona vel því þú átt það nefnilega til að festast í gamalli vitleysu sem að endurómar í heilanum á þér.

Það er ekkert að gerast nema jákvætt, þetta er bjartasti tími sem þú ert að fara inn í því að þú munt þekkja betur sjálfan þig heldur en nokkrum sinnum fyrr.

Einhver ferð sem þú ert nýverið komin úr eða ert að fara í breytir lífi þínu á margan hátt þó þú sjáir það ekki strax. Það er svo margt að breytast á stuttum tíma og ég sé það í kortunum þínum að þú ert búin að reima vel skóna og tilbúin í allt.

Knús og kossar

Sigga Kling