Júníspá Siggu Kling: Dagamunur á Voginni í ástinni

Sigga Kling skrifar 2. júní 2023 06:00

Elsku Vogin mín, það er svo sannarlega hægt að segja að þú finnir lausnir á öllum þeim verkefnum sem þú vilt sjá útkomu á. En líka er það þannig að ef það gerist ekki hratt, unnið vel að markmiði þínu og fólkið í kringum þig sjái ekki að það þurfi að drífa sig, þá er partýið ekki eins skemmtilegt.

Vogin er frá 23. september til 23. október.

Þú þarft að vera hvetjandi við þá sem þú vilt hafa með þér í liði og sýna þeim að þeir græði á þessari lausn sem þú ert búin að finna, ef þeir bara gera það hratt.

Þessi tími núna gefur þér það að þú fáir meiri innkomu fyrir minni vinnu, þú ert mikið tengd flóði og fjöru og þegar lægð er yfir landinu finnst þér þú gjörsamlega missa lífsviljann. Þú þarft að átta þig á því hvers vegna þér finnist þú bókstaflega vera undir sæng. Bara það einfalda að skoða þegar það er lægð og spyrja sjálfa þig, hvað hefur svona áhrif á mig? Og svörin koma til þín. Þegar þú sérð að þetta er ekki þú, þá kemstu út úr þeirri líðan. Tilfinningar þínar verða svo ástríðufullar að þær hafa mikil áhrif á allt sem er í kringum þig því þegar þú ert í góðri action þá ertu miðdepill alls.

Í ástinni áttu það til að vera eins og blessuð blíðan og sólin og næsta dag vera eins og hvirfilvindur. Fyrir þá sem þekkja þig þig skiptir þetta engu máli, því að loka á tilfinningar er ansi erfitt hjá blessaðri Voginni. Fallegustu og mest hrífandi persónurnar eru fæddar í merkinu þínu, en það virðist vera sem þú þurfir að vera á tánum í flestu og þér líður best þegar þú gefur sjálfri þér áskoranir.

Það býr í þér hjartaknúsari og það eru margir í kringum þig sem halda þú sért skotin í þeim, því þú ert blessuð með bjartsýnisdaðri sem er jákvætt því það er ekkert sem þú ekki getur daðrað þig út úr.