Tíu eftir­réttir sem til­valið er að prófa um páskana

Vísir hefur í gegnum árin birt ótal margar uppskriftir frá hinum ýmsu matgæðingum. Það er því vel við hæfi að taka saman nokkrar vel valdar uppskriftir af gómsætum eftirréttum sem er tilvalið að prófa nú um páskana.

Páskaterta Alberts og Bergþórs

Gleðigjafarnir Albert Eiríksson og Bergþór Pálsson töfra fram nýja páskatertu á hverju ári. Hefðin er sú að Bergþór bakar tertuna og Albert birtir síðan uppskriftina á blogginu sínu. Árið 2021 var það Dísudraumur sem varð fyrir valinu.

Páskasmákökur Elenoru

Á síðasta ári sýndi bakarinn Elenora Rós einfalda og ljúffenga uppskrift að súkkulaðibitakökum. Í uppskriftinni er að finna litlu súkkulaðieggin vinsælu sem flestir ættu að kannast við.

Einföld súkkulaðimús

Ef það er eitthvað eitt sem er hægt að treysta á í þessu lífi, þá er það að hún Eva Laufey veit hvað hún syngur þegar kemur að girnilegum eftirréttum. Árið 2019 kenndi hún landsmönnum að gera þessa einföldu en bragðgóða súkkulaðimús.

Oreo ostakökueftirréttur

Í þáttunum Matarboð með Evu fékk Eva Laufey skemmtikraftinn Evu Ruzu til liðs við sig. Þær nöfnur göldruðu meðal annars fram þennan girnilega en ofureinfalda Oreo ostakökueftirrétt.

Gómsæt Pavlova

Hver elskar ekki góða Pavlovu? Maregnseftirrétturinn vinsæli sem kenndur er við ballerínuna Önnu Pavlovu. Í sérstökum páskaþætti af Matargleði Evu galdraði Eva Laufey fram heila páskamáltíð og þar á meðal gómsæta Pavlovu, sem er hinn fullkomni páskaeftirréttur.

Bananatriffli á 15 mínútum

Fyrir þá sem hafa lítinn tíma getur þessi einfaldi eftirréttur bjargað matarboðinu. Hér sýnir Eva Laufey hvernig hægt er að galdra fram ómótstæðilegt bananatriffli með saltaðri karamellusósu á aðeins 15 mínútum.

Grilluð eplabaka

Heit eplabaka er eftirréttur sem fær sennilega flesta til þess að fá vatn í munninn. Hér má finna uppskrift af einni slíkri sem hægt er að skella á grillið. Bakan er svo borin fram með karamellusósu. Til þess að setja punktinn yfir i-ið er svo auðvitað tilvalið að bjóða upp á vanilluís með.

Frönsk súkkulaðikaka

Hin klassíska franska súkkulaðikaka hittir alltaf í mark. Hér fyrir neðan má finna uppskrift af einni slíkri frá matarbloggaranum Berglindi Guðmundsdóttur.

Döðlukaka með karamellusósu

Þeir sem hafa smakkað þessa vita að hér er um að ræða algjöra bombu. Kakan er svo toppuð með „heimsins bestu karamellusósu“ og borin fram með rjóma eða ís.

Ítalskur vanillubúðingur með ástaraldinsósu

Í þættinum Í eldhúsi með Evu sýndi Eva Laufey hvernig töfra mætti fram ítalskan vanillubúðing með ástaraldinsósu. Þetta er eftirréttur sem mun heilla matarboðsgesti upp úr skónum og fær þig til þess að líta út eins og meistarakokk. Athugið að búðingurinn þarf að standa í kæli í tvær til þrjár klukkustundir og því þarf að hefjast handa tímanlega.