Fannst lifandi eftir 174 klukkustundir en vonir um að finna fleiri dvína

Tala látinna eftir skjálftanna sem riðu yfir í Tyrklandi og Sýrlandi fyrir viku, sá stærsti 7,8 að stærð, hefur hækkað stöðugt undanfarna daga en minnst 33 þúsund og allt að 35 þúsund eru nú sagðir látnir. Búist er við að enn fleiri eigi eftir að finnast látnir í rústunum á næstunni.

Hundruð þúsunda eru án heimilis og á vergangi eftir skjálftana en margir bíða jafnvel við rústir þar sem ástvinir þeirra sitja fastir. Langflestir þeirra sem hafa látist eru í Tyrklandi en einhverjir eru enn að finnast lifandi í rústunum, þó talsvert færri núna en í upphafi.

Í dag náðu björgunarsveitir í Antakya til að mynda að bjarga konu sem hafði setið föst í rústum byggingar í 174 klukkustundir, rúma sjö sólarhringa. Fyrr um daginn hafði tekist að bjarga fertugri konu í Gaziantep héraði og sextugum manni í Adiyaman héraði.

Ólíklegt þykir þó að mikið fleiri muni finnast lifandi í framhaldinu. AP fréttaveitan hefur það eftir prófessor sem stóð fyrir rannsókn um dauðsföll eftir jarðskjálfta að líkurnar á því að finna eftirlifendur dvíni talsvert eftir fimm daga og séu nánast engar eftir níu daga. Frost sem er á svæðinu hjálpar ekki til.

Gríðarleg eyðilegging blasir þá við og er mikil reiði meðal íbúa sem komust lífs af. Margir kenna gölluðum mannvirkjum um hvernig fór og hafa yfirvöld í Tyrklandi brugðist við. Að minnsta kosti 131 verktaki sætir rannsókn vegna bygginga sem náðu ekki að standast skjálftana, að sögn dómsmálaráðherra Tyrklands.

Í Sýrlandi segja yfirvöld alþjóðasamfélagið hafa brugðist og hafa Sameinuðu þjóðirnar viðurkennt að þeim hafi mistekist að hjálpa Sýrlendingum eftir skjálftana. Tedros Adhanom Ghebreyesus, aðalframkvæmdastjóri Alþjóðaheilbrigðismálastofnunarinnar, fundaði með Bashar Assad, forseta Sýrlands, í gær til að ræða þarfir Sýrlands í framhaldinu.

Hluti íslenska hópsins enn í Tyrklandi

Fjölmörk ríki hafa boðið fram aðstoð sína, styrkt björgunarstarf og sent sjálfboðaliða. Níu manna sérfræðingateymi frá Íslandi fór til Tyrklands í síðustu viku til að stýra aðgerðum alþjóðarústabjörgunarsveita og voru þau stödd í búðum Hollendinga í Antakya fyrstu dagana, að sögn Sólveigar Þorvaldsdóttur, samhæfingarstjóra teymisins.

„Við erum hér með fólk til þess að vinna, tölvur og lágmarksbúnað, en við erum ekki með búnað til að setja upp heila stjórnstöð. Þannig þegar Hollendingar voru að fara heim þá ætluðum við bara að fara líka og það var ákveðið að Bandaríkjamenn myndu taka við samhæfingastjórnun en svo fóru umræður af stað og við vorum beðin um að koma á vera hérna með Bandaríkjamönnum,“ segir Sólveig.

Fjórir úr íslenska hópnum færðu sig yfir í búðir Bandaríkjamanna í Adiyaman í gær. Hinn hluti íslenska hópsins mun fljúga til Sviss í dag en þau koma heim á morgun. Þeir sem eru á heimleið eru þeir sem voru að setja upp búðirnar, verkfræðingar og læknir. Þar sem bandaríski hópurinn er með slíka var ekki þörf á þeim lengur. 

Íslendingarnir, ásamt tveimur öðrum úr bandaríska hópnum, stýra nú samhæfingu allar alþjóðlegra rústabjörgunarsveita á skaðasvæðunum í Tyrklandi. Bandaríkin eru með rústabjörgunarsveit á staðnum ásamt fulltrúum USAID. Sólveig gerir ráð fyrir að þau verði ekki lengur en fimm daga til viðbótar. 

„Við vorum búin að koma á fót hópum sem eru að starfa á tíu mismunandi svæðum og nú erum við byrjuð að loka svæðum. Þannig þetta er að fara niður en þetta er samt ekki alveg búið. Bara fyrir klukkutíma síðan var beiðni um að senda sveitir á ákveðið svæði, þannig þetta er alls ekki búið en þetta er ekki eins og þetta var fyrir nokkrum dögum síðan,“ segir Sólveig.