María heldur sæti sínu í norska landsliðinu

Norska landsliðið mun spila þrjá æfingarleiki í Frakklandi seinna í þessum mánuði. Liði mætir þar Úrúgvæ, Danmörku og Frakklandi.

María er ein af níu varnarmönnum í hópnum. Það vakti athygli þegar Hege Riise tók fyrst við norska landsliðinu þá henti hún Maríu út úr liðinu. María, sem spilar með Manchester United í ensku úrvalsdeildinni, sparaði stóru orðin og vann sér sæti aftur í landsliðinu.

Hún var með síðasta og svo aftur nú í fyrsta landsliðshópi Norðmanna á árinu 2023.

María gat einnig spilað með íslenska landsliðinu en faðir hennar er handboltaþjálfarinn Þórir Hergeirsson.

María valdi það norska enda búsett í Noregi og ólst þar upp. Hún lék einn landsleik fyrir sextán ára landslið Íslands en valdi svo Noreg.

María lék sinn fyrsta A-landsleik á móti Íslandi í mars 2015 en hún spilaði sinn 64. landsleik á móti Englendingum í nóvember síðastliðnum.