Nýársspá Siggu Kling - Fiskarnir

Það er eins og þú hafir styrkst og að þú hugsir líkt og vitringur. Þú lærir líka að vera útsmognari en þú hefur verið. Og þú ferð að taka betur eftir því þegar þú skynjar að þú eigir ekki að fara eitthvað, þó að það sé verið að toga þig eitthvert. Þú veist að þú þarft ekki að lúta að neinum öðrum lögmálum en hjarta þitt segir þér.

Þú munt semsagt láta egóið til hliðar að mestu leyti, því að fallega hjartað þitt mun stýra þessu ári. Ég var að horfa á heimildarmynd þar sem kom fram að það eru fjörutíu og eitthvað þúsund frumur í líkamanum sem líkjast heilafrumum. Svo að þegar að þig vantar góð ráð og þú þarft að taka ákvörðun, settu þá höndina á hjartastað þinn og gáðu hvað kemur til þín.

Febrúar, mars og apríl einkennast af hraða og ævintýrum, það er eins og þú getir notað setninguna rammíslensku „þetta reddast“.  Alveg sama hversu tæpt hlutirnir standa, þá gengur allt upp á síðustu sekúndu.

Þú ert á svo góðum stað í maí og júní og ástin flæðir frá þér og til þín; ást er allt. Og þótt að það komi mikil og vandmeðfarin verkefni upp í hendurnar á þér þegar haustar, þá skaltu ekki líta á þau sem vandamál. Heldur eru þau einhverskonar keppni, hvort sem það beinist að sjálfum þér eða öðrum. Á þessum tíma er líka gott að láta ekki alla vita hvað þú ert að gera, og að láta engan vita um þín leyndarmál. Því að útkoman mun koma þér á óvart og þeim sem elska þig.

Orkan, þrekið og þrótturinn verður betri þegar að líða tekur á. Þú verður að skoða það sjálfur hvað þú þarft að gera til þess að orkan þín flæði. Það mikilvægasta á þessu ári er að nenna að gera það sem breytir lífinu þínu. Það að vera í sama umhverfinu, með sama fólkinu og með sömu rútínu gefur þér ekki það sem þú í raun óskar þér.

Það er í þínu eðli að vera traustur og tryggur í ástinni. Þú vilt vernda þann sem þú elskar og stundum kannski aðeins um of. Það fer þér best að vera ekki að skipta um „partner“ nema að nauðsynlegt sé. Ástin mun færa þér gleði á þessu ári. Þú verður svo þakklátur fyrir það sem þú hefur, og verður meira að segja auðmjúkur. Það er allt að breytast og bætast í þínu lífi.

Knús og kossar, Sigga Kling