Miedema, sem skorað hefur 94 mörk í 112 landsleikjum, missti af tveimur leikjum í riðlakeppni EM vegna smitsins en það kom þó ekki í veg fyrir að Holland kæmist í 8-liða úrslitin. Þar bíður liðsins hins vegar afar erfiður leikur gegn Frökkum á laugardagskvöld.
Á Twitter-síðu hollenska liðsins var í dag greint frá því að Miedema væri nú mætt aftur í hollenska hópinn og má því fastlega búast við því að hún spili gegn Frakklandi.
= #NothingLikeOranje #WEURO2022 pic.twitter.com/65KzRydfRy
— OranjeLeeuwinnen (@oranjevrouwen) July 20, 2022
Miedema var með í jafnteflinu við Svía í fyrsta leik Hollands á EM en missti svo af leikjunum við Sviss og Portúgal, og varð að halda upp á 26 ára afmælið sitt í einangrun á hótelherbergi.
Hollendingum veitti ekki af góðum fréttum eftir að í ljós kom að Lieke Martens yrði ekki meira með liðinu á mótinu vegna meiðsla, og markvörðurinn og fyrirliðinn Sari van Veenendaal hafði áður meiðst í öxl og þurft að draga sig úr hópnum. Þá missti Aniek Nouwen af tveimur leikjum vegna ökklameiðsla. Jackie Groenen smitaðist einnig af kórónuveirunni, eins og Miedema, en missti aðeins af einum leik.
