Jafnaði félagsmetið í þristum þrátt fyrir að byrja á bekknum

Argentínumaðurinn Luciano Massarelli þurfti bara tæpar 24 mínútur í gærkvöldi til að jafna félagmet Þórs yfir flesta þrista í einum leik í úrvalsdeild karla.

Massarelli hitti úr 9 af 11 þriggja stiga skotum sínum og jafnaði þar með met Larry Thomas frá því 28. janúar i fyrra.

Thomas skoraði þristana sína í útileik á móti KR og bætti þá rúmlega tveggja ára met Nikolas Tomsick frá því í Smáranum 15. nóvember 2018.

Massarelli kom með 29 stig inn af bekknum í gær og hefur þar með komið með 59 stig inn af bekknum í síðustu tveimur leikjum.

Massarelli hitti nefnilega úr 6 af 11 þriggja stiga skotum sínum í sigri á Stjörnunni aðeins þremur dögum fyrr.

Hann er því með 15 þriggja stiga körfur 22 skotum í síðustu tveimur leikjum sem gerir 68 prósent nýtingu.

Það virðist henta Massarelli betur að byrja á bekknum því hann hitti úr 46,2 prósent þriggja stiga skota sinna þegar hann byrjar ekki en bara 29,5 prósent þegar hann er í byrjunarliðinu.