Veit fátt betra en rétt eldað andaconfit salat

Það er í mörg horn að líta hjá Hrefnu og í raun í enn fleiri horn en venjulega þar sem hún og eiginmaður hennar tóku ákvörðun snemma árs að fjölga í fjölskyldunni með því að fá sér French Bulldog hvolp sem ber nafnið Izzy. Hrefna sem hefur alla tíð verið annáluð kattakona er hæstánægð með viðbótina og segir tvö börn þeirra hjóna það líka og eins kettina sem fyrir voru á heimilinu. 

„Sambúðin gengur vonum framar og þó svo að það séu auðvitað viðbrigði fyrir alla að fá hund inn á heimilið náðum við öll að tengjast honum strax og finnst okkur eins og hann hafi alltaf verið partur af fjölskyldunni. Ég held að Izzy finnist það líka, allavega lætur hann eins og hann hafi átt húsið frá byggingu þess,“ segir Hrefna og hlær.

Það er ekki bara heima fyrir sem verkefnin bíða Hrefnu daglega því hún á og rekur í félagi við aðra veitingastaðina Grillmarkaðinn og Fiskmarkaðinn. Svo eiga hún og eiginmaður hennar, ljósmyndarinn Björn Árnason, Skúla Craft bar sem Björn eða Bjössi eins og hann er kallaður rekur. 

Fiskmarkaðurinn var fyrsti veitingastaðurinn sem Hrefna opnaði en það var á því herrans ári 2007 og naut strax mikilla vinsælda. Grillmarkaðurinn var svo opnaður árið 2011 og hefur frá stofnun, líkt og Fiskmarkaðurinn, verið einn vinsælasti veitingastaður landsins. Einn mest pantaði réttur staðarins er Andasalatið sem samanstendur meðal annars af confit elduðum andalærum, spínati, mandarínum, myntu og koríander dressingu. 

Hrafnhildur Hermannsdóttir, einn eigenda Eldum rétt, nálgaðist Hrefnu fyrr á árinu og úr varð að Hrefna er nú gestakokkur Eldum rétt til 8. desember. Hún útbjó tvo matarpakka sem sem annars vegar inniheldur misomarineruð kjúklingalæri og hins vegar hið rómaða andasalat.

Hrefna segir þann rétt einmitt vera einn af sínum uppáhalds og þó svo að hún hafi gert hann í mörgum útgáfum, þá sé sú útgáfa sem hún býður viðskiptavinum sínum upp á og nú viðskiptavinum Eldum rétt að prófa að gera, sú sem hún sjálf er hvað mest svag fyrir og veit í raun fátt betra. 

„Það er einfalt og skemmtilegt að gera réttinn sem er auðvitað alltaf bónus en aðalbónusinn kemur auðvitað þegar sest er niður og hann borðaður því rétt eldað andaconfit salat er ljúffengt,“ segir Hrefna.

Hér fyrir neðan má finna tvær uppskriftir frá Hrefnu Sætran fyrir hátíðarnar. 

Jólakrumpur

20 - 22 kökur

• 1 bolli hveiti
• ½ bolli kakó
• 1 tsk lyftiduft
• ¾ bolli sykur
• ¼ bolli olía
• 2 egg
• 1 tsk vanilluduft eða dropar
• ¾ bolli hvítir súkkulaðidropar
• 1 bolli flórsykur

Aðferð: 

Blandið saman hveiti, kakó, lyftidufti. Blandið saman sykri og olíu og þeytið saman í hrærivél þar til blandan verður ljós og létt. Bætið eggjunum og vanillunni út í. Bætið svo hveitiblöndunni varlega saman við og loks hvítu súkkulaðidropunum. Búið til bolta úr deiginu, vefjið því í plastfilmu og kælið það í amkl 2 klst eða lengur. Hitið ofninn upp í 180°c. Gerið svo litlar kúlur úr deiginu og veltið þeim upp úr flórsykrinum. Setjið þær svo á bökunarplötu og bakið í 10 mín.

Sítrusgrafinn lax

• 2 dl gróft salt
• 2 dl sykur
• 1 msk kóríander fræ
• 2 msk dill
• 1 stk rautt grape
• 1 stk lime
• 2 stk mandarínur

Aðferð: 

Blandið saman saltinu og sykrinum. Merjið korianderfræin létt í morteli og bætið út í ásamt dillinu. Setjið 1/3 af blöndunni í fat og dreyfið vel úr því, leggið laxinn ofan á með roðhliðina niður. Setjið svo afganginn af saltblöndunni yfir. Skerið sítrusávextina í þunnar sneiðar og raðið yfir. Geymið inni í ískáp í 1-3 sólahringa. Fer eftir því hversu stórt laxaflakið er og hversu mikið grafið þú vilt hafa það. Ég er sjálf með þetta í 2 sólahringa núna í ár á frekar þykku flaki.