„Körfubolti er leikur áhlaupa og augnablika“

„Bæði lið ætluðu sér að sækja sigurinn í kvöld. Við byrjuðum rosalega vel en þeir náðu að koma til baka og börðust vel. Þeir eru með gott lið, þeir dreifa boltanum vel sín á milli. Allir leikmenn sem spila hjá þeim eru góðir. Þetta var erfiður leikur en í restina þá framkvæmdum við okkar plan betur og þeir urðu þreyttir og pirraðir á varnarleiknum okkar. Við náðum að spila vel í 40 mínútur þrátt fyrir utan nokkur áhlaup hjá þeim,“ sagði Massamba í viðtali við Vísi eftir leik.

„Við spilum sem lið, það eru margir í okkar lið sem geta skorað. Ég fórnaði fullt af mínum skotum til að reyna að leyfa öðrum að skjóta.“

Stólarnir unnu fyrsta leikhluta með 11 stigum áður en Njarðvík komst aftur inn í leikinn og náði að jafna fyrir hálfleik.

„Körfubolti er leikur áhlaupa og augnablika. Í fyrsta leikhluta þá var stemningin með okkur og sérstaklega í vörninni. Í öðrum leikhluta ná þeir góðu áhlaupi á okkur á meðan við hittum ekki. Við vorum að flýta skotunum okkar of mikið og þeir hittu nánast úr öllum skotunum sínum í öðrum leikhluta,“ svaraði Massamba, aðspurður hvers vegna fyrstu tveir leikhlutarnir voru svona sveiflukenndir.

Thomas Kalmeba-Massamba spilaði allan fyrri hálfleikinn með sárabindi á höfðinu eftir að hann fékk skurð á hausinn snemma í fyrsta leikhluta.

„Ég var að reyna að stöðva leikstjórnanda þeirra og ég fékk lappirnar hans í höfuðið, ég er viss um að þetta hafi verið óviljaverk hjá honum. Þetta getur skeð. Mér líður vel í hausnum núna en það er að ég held aðallega vegna þess að við unnum leikinn. Ef við höfðum tapað þá hefði ég sennilega verið að kvarta yfir meiðslunum,“ sagði Massamba hlægjandi að lokum um höfuðmeiðslin sem hann varð fyrir.