Mercedes-Benz fjárfestir í framleiðslu rafbíla

Daimler, eigandi Mercedes-Benz, hefur fjárfest fyrir alls 730 milljónir evra í verksmiðju sem mun einblína á framleiðslu á rafbílum frá Mercedes-Benz, það samsvarar um 118 milljörðum króna.

Verksmiðjan er í Sindelfingen í Þýskalandi þar sem fleiri verksmiðjur Mercedes-Benz eru staðsettar og hefur fengið heitið „Verksmiðja 56“. Alls hefur Daimler fjárfest fyrir 2,1 milljarð evra á Sindelfingen svæðinu eða tæpa 340 milljarða króna samkvæmt fréttatilkynningu frá Öskju.

Verksmiðja 56 er eins sú tæknivæddasta í heimi en auk þess mun hún vera sérlega skilvirk, sveigjanleg og sjálfbær í rekstri. Notast er við gervigreind til að sérsníða hvern bíl sem framleiddur er í verksmiðjunni eftir vali hvers viðskiptavinar fyrir sig. Þar verða framleiddir rafbílar af öllum stærðum og gerðum en framundan er mikil aukning í framleiðslu rafbíla frá Mercedes-Benz. 

Verksmiðja 56 mun auka skilvirkni um 25% vegna framleiðslu á nýrri kynslóð lúxusbílsins S-Class. Bíllinn er búinn miklum tæknibúnaði og getur að miklu leyti ekið á sjálfstýringu. S-Class er flaggskip fólksbílaflota Mercedes-Benz.

Mercedes-Benz stefnir á að í lok árs 2021 verði komnir fimm hreinir rafbílar á markað frá þýska lúxusbílaframleiðandanum; þeir eru EQC, EQV, EQA, EQB og EQS.