Tuttugu manns handteknir í mótmælunum í Bangkok

Lögreglan í Tælandi handtók um tuttugu manns sem tóku þátt í fjölmennum mótmælaaðgerðum í Bangkok, höfuðborg landsins, í gærkvöldi.

Nöfn hafa ekki verið gefin upp, en samkvæmt frétt breska ríkismiðilsins BBC eru nokkrir af helstu talsmönnum mótmælenda meðal hinna handteknu, þar á meðal Anon Nampa mannréttindalögmaður og þekktur aðgerðarsinni innan stúdentahreyfingarinnar, Parit Chiwarak.

Heimildir fréttamiðilsins eru studdar af myndbandsupptökum sem streymt var á netinu af atburðum á vettvangi.

Neyðarástandi vegna mótmælanna í Bangkok var lýst yfir í gærkvöldi, en þar með eru yfirvöldum veittar heimildir til að stöðva hvers kyns mótmæli og stærri samkomur, sem og að beita valdi ef svo ber undir. Þá eru hömlur settar á umfjöllun fjölmiðla af gangi mála.

Lýðræðishreyfing sem leidd er af stúdentum hefur krafist afsagnar forsætisráðherra landsins og að dregið verði úr völdum Maha Vajiralongkorn konungs.

Mótmæli hafa staðið yfir nokkuð linnulaust frá því í júlí en upphaf þeirra má rekja til þess að dómstóll skipaði fyrir um að stjórnarandstöðuflokkur skyldi leystur upp í febrúar.