Gylfi og Jóhann Berg farnir til Englands og sjö leikmenn dottnir út úr hópnum

Erik Hamrén, þjálfari íslenska karlalandsliðsins, útskýrði fjarveru leikmanna í leiknum á móti Belgíu á Laugardalsvelli á morgun, þegar hann hitti blaðamenn í dag.

Sjö leikmenn verða fjarverandi í þessum leik en það eru Aron Einar Gunnarsson, Gylfi Þór Sigurðsson, Jóhann Berg Guðmundsson, Kári Árnason, Ragnar Sigurðsson, Alfreð Finnbogason og Arnór Sigurðsson.

Erik Hamrén sagði á blaðamannafundi í dag að hann hafi fyrir fram ætlað að passa upp á það að sem fæstir leikmenn myndu spila alla þrjá leikina í þessum glugga en íslenska liðið spilaði þrjá leiki á sex dögum. Allt voru þetta keppnisleikir og bæði erfiðir líkamlega og andlega.

Erik Hamrén leyfði Gylfa Þór Sigurðssyni og Jóhanni Berg Guðmundssyni að fara heim til sinna til í Englandi en hann taldi það vera best fyrir þá og um leið þá best fyrir íslenska landsliðið fyrir leikinn mikilvæga á móti Ungverjum í næsta mánaða.

Hamrén sagði að Jóhann Berg hafi ekki getað spilað gegn Danmörku eins og vonast hafði verið til. „Hann var ekki hundrað prósent og við vildum því ekki taka neina áhættu með hann,“ sagði Erik Hamrén.

Gylfi fær líka nokkra daga til að sýna sig fyrir Carlo Ancelotti, knattspyrnustjóra Everton. „Þetta var best fyrir hann og þar með best fyrir okkur,“ sagði Hamrén.

Erik Hamrén fór líka yfir meiðslin í hópnum sem og að hann hefði náð samkomulagi við Al Arabi að Aron Einar færi heim eftir tvo fyrstu leikina. Sjö leikmenn eru þar með dottnir út úr hópnum.

Kári Árnason, Ragnar Sigurðsson og Alfreð Finnbogason meiddust allir í síðustu tveimur leikjum og þá er Arnór Sigurðsson ekki búinn að jafna sig á meiðslunum sem hafa haldið honum frá síðustu leikjum.