Platan, Undir bláu tungli, kom út á streymisveitum síðasta föstudag og er platan önnur breiðskífa tónlistarmannsins Loga Pedro. Fyrsta plata hans, Litlir svartir strákar, kom út árið 2018 og hlaut hún mikið lof gagnrýnenda.
Undir bláu tungli var tekin upp bæði á Íslandi og í Síerra Leóne og segir Logi plötuna vera að mörgu leyti ólíka fyrri plötu sinni.
Ytri aðstæður og innri aðstæður eru aðrar. Lífið breytist svo fljótt, allt er á einhverjum formúluhraða. Þessi plata er að mínu mati töluvert þéttari. Svona plata sem maður rennir oft í gegn.
Umfjöllunarefni plötunnar segir Logi vera að miklu leyti um þetta milliheima mengi sem oft er talað um sem þriðja menningarheiminn.
„Þegar að þú upplifir menningarheim sem er ekki mömmu þinnar og ekki pabba þíns, heldur einhver einstakur heimur. Algjörleg eitthvað annað, eitthvað nýtt og þinn.“
Lonlí blú boj
Vinnuheitið á plötunni segir Logi í byrjun hafa verið Lonlí blú boj en svo hafi hann ráðfært sig við hönnuðinn Sigga Odds sem vann með honum að útliti plötunnar.
Við ræddum þetta fram og til baka síðustu vikurnar fyrir útgáfuna og okkur fannst, Undir bláu tungli, kjarna stemmninguna en þetta small allt einhvern veginn saman þegar nafnið var loksins komið.
Aðspurður hvernig það sé að vera að gefa út plötu á þessum tímum, segir Logi það vera bæði skemmtilegt og skrítið.
„Það er skemmtilegt að gefa út plötu á þessum tímum, en rosalega skrítið að spila ekkert, geta ekki haldið útgáfuteiti og allt því tengt. Ég vona samt innilega að það rætist úr þessu á næstu vikum.“
Það verður svo gaman að geta mætt á Prikið og spilað plötuna. Jafnvel halda útgáfutónleika einhversstaðar á næsta bláa tungli.
