Grímu­skylda í al­mennings­sam­göngum í Dan­mörku

Yfirvöld í Danmörku kynntu í morgun hertar aðgerðir vegna kórónuveirufaraldursins og verður meðal annars skylt að bera grímur fyrir vitum í almenningssamgöngum frá og með laugardeginum 22. ágúst. Aðgerðirnar voru kynntar á blaðamannafundi í morgun.

Mette Frederiksen, forsætisráðherra Danmerkur, kynnti aðgerðirnar á fundinum og sagði hún það vel koma til greina að grímuskylda yrði sett á á fleiri stöðum þar sem fólk safnast saman, til dæmis í verslunum og heilsugæslum.

Grímuskyldan á ekki aðeins við inni í almenningssamgöngum, svo sem strætóvögnum eða lestum, heldur einnig á lestarstöðvum og strætóstoppum. Sé fólk ekki með grímur þurfi það að yfirgefa vagnana. Þetta gildir einnig um leigubíla og ferjur og gildir um alla yfir 12 ára aldri. Einhverjir fullorðnir einstaklingar geta þó fengið undanþágu vegna heilbrigðisástæðna.