Sæðistaka úr Ský alla daga þar sem dropinn kostar sitt

Stóðhesturinn Skýr frá Skálakoti hefur meira en nóg að gera þessa dagana því það er verið að taka sæði úr honum til að fylja hryssur með um allt land. Dropinn úr Ský er ekki gefins því folatollurinn er 370.000 krónur. Skýr hlaut nýlega Sleipnisbikarinn, sem er æðsta viðurkenning íslenskrar hrossaræktar.

Stóðhesturinn Skýr er þrettán vetra frá Skálakoti undir Eyjafjöllum. Hann er rauðblesóttur og einn allra vinsælasti stóðhestur landsins í dag.

Skýr er mjög gæfur og rólegur hestur enda geta börn og fullorðnir riðið honum. Eigendur hans er Guðmundur Viðarsson í Skálakoti undir Eyjafjöllum og Jakob Svavar Sigurðsson tamningamaður sem hefur unnið til fjölda verðlauna á honum.

Sæðistakan fer fram á bænum Hemlu í Vestur-Landeyjum í Rangárþingi eystra. Það er Guðríður Eva Þórarinsdóttir, dýralæknir á Flúðum, sem sér um sæðistökuna en tekið er úr honum á hverjum morgni og er hægt að skipta sæðinu í nokkra skammta. Stundum nást átta skammtar, sem þýðir tæplega þrjár milljónir króna í peningum fyrir eigendurna því hver folatollur er seldur á 370.000 krónur.

„Það er mjög afstætt hvað er dýrt, þú getur haldið undir einhvern fola frítt og það er bara 25.000 króna sláturfolald. Síðan heldur þú undir Ský frá Skálakoti og þú átt kannski möguleika á því strax að eiga tveggja milljóna króna merfolald, þá er spurning hvað er dýrt,“ segir Guðmundur í Skálakoti og bætir við: „Hann fæddist fallegur og hefur verið að gefa falleg og góð afkvæmi frá því að við byrjuðum að æxla honum við merar.“

Skýr hefur tekið þrisvar sinnum þátt í meistaradeildinni og alltaf unnið fimmganginn þar sem Jakob Svavar Sigurðsson hefur riðið honum til sigurs.

„Þetta er bara algjör snillingur og yfirburða hestur og búinn að vera í uppáhaldi hjá mér frá því að hann kom í tamningu þriggja vetra gamall. Skýr er gott dæmi um draumahest allra hestamanna því það getur hver sem er riðið þessum hesti hvort sem það væri byrjandi eða atvinnumaður, það er hægt að nota hann í hvaða verkefni sem er,“ segir Jakob Svavar.