Birta nöfn þeirra sem létust í eldgosinu á Hvítu eyju

Lögreglan á Nýja Sjálandi birti í morgun nöfn þeirra sem létu lífið í eldgosinu á Hvítu eyju á dögunum.

Átján manns létust þegar fjallið fór allt í einu að gjósa fyrir rúmri viku en þá var hópur ferðamanna staddur á eyjunni, sem var vinsæll áningarstaður skemmtiferðaskipa.

Nöfn sautján einstaklinga hafa verið birt en ein persóna sem lét lífið á eyjunni hefur enn ekki verið nafngreind.

Tveggja hinna látnu er síðan enn saknað, en talið er að þau séu einhverstaðar á eyjunni eða í grennd við hana. Leit að þeim hefur verið hætt sökum veðurs í bili.

47 voru á eynni þegar hamfarirnar hófust og um tuttugu manns eru enn á gjörgæslu með alvarleg brunasár um allan líkaman.

Þar á meðal er hinn nítján ára gamli Jesse Sanford, sem er eini eftirlifandinn úr heilli fjölskyldu sem var saman á eyjunni þegar fjallið tók að gjósa. Hin látnu eru á aldrinum þrettán til 53 ára og komu flest frá Ástralíu og Bandaríkjunum.