Á fjórða tug brúðkaupsgesta féll í aðgerðum hersins

Að minnsta kosti 35 óbreyttir borgarar sem voru viðstaddir brúðkaup létu lífið í sprengingum og skothríð þegar stjórnarherinn í Afganistan réðst á fylgsni vígamanna í Helmand-héraði í gær. Þrettán til viðbótar særðust, að sögn Reuters-fréttastofunnar.

Stjórnarherinn hélt því fram að árásin hefði beinst að húsi þar sem talibanar hafi þjálfað sjálfsmorðssprengjumenn við hliðina á heimili brúðarinnar. Hermenn hafi eyðilagt mikið magn búnaðar hryðjuverkamanna í árásinni. Rúmlega tuttugu talibanar hafi verið felldir og fjórtán handteknir.

Embættismaður afganska varnarmálaráðuneytisins segir að einn vígamannanna hafi sprengt sjálfsmorðsprengjuvesti sem varð honum og nokkrum öðrum að bana, þar á meðal konu.