Einfaldir kjúklingaréttir

Kjúkling er hægt að elda á ótal marga vegu. Þess vegna er alltaf þægilegt að grípa til hans þegar maður veit ekkert hvað ætti að elda. Hér eru nokkrar hugmyndir að réttum með kjúklingi. 

Kjúklingapasta er fínn hversdagsmatur. Það er auðvelt að útbúa og svo getur maður sett í alls konar uppáhalds eftir smekk. Hér er uppskrift að kjúklingapasta. Það má nota afganga af kjúklingi í þessa uppskrift. Uppskriftin miðast við fjóra.

Pastasalat með kjúklingi

4 úrbeinuð kjúklingalæri eða bringur eftir smekk

¼ tsk. salt

¼ tsk. pipar

2 msk. smjör eða olía til steikingar

Pastasalat

250 g pastaskeljar

1 pakki kirsuberjatómatar

½ rauðlaukur

2 vorlaukar

1 poki klettasalat

Svartar ólífur

Ristaðar furuhnetur

1 mozzarella-ostur

Sjóðið pasta eftir leiðbeiningum. Sigtið, skolið með köldu vatni og setjið til hliðar. Bragðbætið lærin með salti og pipar og steikið á pönnu um það bil 2 mínútur á hvorri hlið. Lækkið hitann, setjið lok á pönnuna og látið malla áfram í 4-5 mínútur.

Skerið tómatana til helminga, rauðlaukinn í þunnar sneiðar og vorlaukinn smátt. Skolið klettasalatið og þerrið síðan. Setjið á disk ásamt tómötum, lauk og ólífum. Skerið kjúklinginn í þunnar sneiðar og dreifið yfir salatið ásamt smátt skornum mozzarella-ostinum og furuhnetum. Ýrið smávegis jómfrúarolíu yfir og piprið. Salatið er borið fram með góðu brauði.

Tandoori-kjúklingur

Þetta er bragðgóð uppskrift og spennandi. Hún miðast við fjóra.

8 úrbeinuð kjúklingalæri (má líka vera á beini)

Tandoori-marinering

10 negulnaglar

2 tsk. kóríanderfræ

2 tsk. cumin

Fræ úr 10 heilum kardimommum

2 laukar

4 hvítlauksrif

2 msk. rifinn, ferskur engifer

2 tsk. chilli-pipar (duft)

2 tsk. pipar

1 tsk. túrmerik

5 dl hrein jógúrt

1 dl sítrónusafi

Ristið negulnagla, kóríanderfræ, cumin og kardimommur í nokkrar mínútur á þurri pönnu. Kælið og setjið í mortél. Maukið þar til verður jöfn og fín blanda.

Setjið lauk, hvítlauk og engifer í matvinnsluvél ásamt chilli-pipar, pipar og túrmeriki. Hrærið vel saman.

Setjið jógúrt í skál og bætið í hana sítrónusafa. Bætið kryddinu saman við og lauk- og engiferblöndunni.

Skerið kjúklinginn í bita og setjið í marineringuna. Best er að láta standa yfir nótt í kæliskáp.

Setjið í eldfast mót og inn í 200°C heitan ofn. Bakið í um það bil 30 mínútur eða þangað til kjúklingurinn er gegnumsteiktur.

Berið fram með tómötum og gúrku, hrísgrjónum, mango chutney og tzatsiki.

Ítalskur kjúklingaréttur

Mjög góður réttur sem einfalt er að gera. Uppskriftin er stór og ætti að duga fyrir átta.

6 úrbeinuð kjúklingalæri

1 laukur

2 hvítlauksrif

1 dl hvítvín

2 dósir tómatar

1 tsk. óreganó

100 g sveppir

Svartar ólífur

3 msk. parmesan-ostur

Skerið lauk, hvítlauk og sveppi. Brúnið kjúklinginn og takið hann síðan frá. Steikið lauk, hvítlauk og sveppi. Bætið hvítvíni yfir og látið allt malla í nokkrar mínútur. Bætið þá tómötum saman við og kryddið með óreganó. Núna eru kjúklingabitarnir settir út í aftur og allt látið malla í um það bil 30 mínútur. Dreifið svörtum ólífum yfir réttinn og bragðbætið með salti, pipar og óreganó. Stráið rifnum parmesan-osti yfir réttinn í lokin. Það má bera þennan rétt fram með pasta eða bara góðu brauði.

Núðlusúpa með kjúklingi, karrí og kókos

Þetta er mjög góð núðlusúpa sem hægt er að gera á margvíslegan hátt. Það má nota afgang af kjúklingi og það má bæta alls kyns grænmeti við, til dæmis kúrbút, baunum, gulrótum, sveppum og tómötum. Uppskriftin miðast við fjóra.

600 g úrbeinuð kjúklingalæri

250 g núðlur

1 msk. rifin, fersk engiferrót

3 hvítlauksrif

1 haus spergilkál

4 vorlaukar

1 rauðlaukur

2 msk. rautt karrímauk (curry paste)

2,5 dl kjúklingasoð

4 dl kókosmjólk

2 msk. fiskisósa

2 tsk. sykur

1 límóna

Ferskt kóríander og basil

Olía til steikingar

Skerið kjúklinginn í bita. Sjóðið núðlurnar eftir leiðbeiningum á umbúðum. Hreinsið og skerið spergilkál, lauk, vorlauk og hvítlauk. Steikið engifer og hvítlauk í olíu yfir meðalhita. Bætið karrímaukinu við og setjið meiri olíu ef þarf. Næst fer kjúklingurinn út á pönnuna og hann steiktur. Setjið því næst kjúklingasoð og kókosmjólk.

Látið suðuna koma upp, lækkið síðan hitann og látið malla áfram. Setjið spergilkálið út í og bragðbætið súpuna með fiskisósu, sykri og límónusafa.

Loks eru núðlurnar settar út í súpuna, Skreytið hana í lokin með vorlauk og rauðlauk.