Körfubolti

Fullkomið kvöld hjá Hayward í sigri Boston

Ástrós Ýr Eggertsdóttir skrifar
Öll skot Hayward í nótt sungu í netinu
Öll skot Hayward í nótt sungu í netinu vísir/getty
Gordon Hayward fór á kostum er Boston Celtics hafði betur gegn Indiana Pacers í bandarísku NBA deildinni í körfubolta í nótt.

Hayward kom inn af varamannabekknum og setti öll níu skotin sín ofan í körfuna og skilaði þremur vítaskotum sem gaf honum 21 stig og hjálpaði Celtics til 117-97 sigurs.

Með sigrinum fóru grænir langt með að tryggja sér fjórða sætið í austurdeildinni og heimaleikjarétt í 8-liða úrslitunum en þessi lið berjast um fjórða sætið. Boston er nú einum sigri ofar en Indiana og með betri innbyrðisstöðu þegar aðeins tveir leikir eru eftir af deildarkeppninni.

Jason Tatum var stigahæstur í liði Boston með 22 stig, Myles Turner gerði 15 stig fyrir Indiana.



Ríkjandi meistarar í Golden State unnu sex stiga heimasigur á Cleveland Cavaliers í leik þar sem Stephen Curry færði sig upp í þriðja sæti á stigalista félagsins.

Curry skoraði 40 stig fyrir Golden State og er nú þriðji stigahæsti leikmaður Warriors frá upphafi með 16.283 stig. Wilt Chamberlain, 17.783, og Rick Barry, 16.447, eru þeir einu sem eru fyrir ofan hann.

Curry skoraði níu þriggja stiga körfur í leiknum og átti sjö stoðsendingar. Golden State komst í 21 stigs forystu en þurfti að halda aftur af áhlaupi Cleveland og endaði leikurinn í 120-114 sigri Warriors.

Þessi lið mættust í úrslitum NBA deildarinnar síðustu fjögur ár en það var ekki sami glansinn í kringum þennan leik. Golden State er á leið í úrslitakeppnina á ný, þeir sitja á toppi vesturdeildarinnar, en Cleveland á engan möguleika á að komast í úrslitakeppni austurdeildarinnar.



Denver Nuggets er enn í möguleika á því að taka toppsæti vesturdeildarinnar af Golden State eftir sigur á Portland Trail Blazers.

Nikola Jokic skoraði 22 stig fyrir Denver og var hársbreidd frá tvöfaldri þrennu með 13 fráköst og níu stoðsendingar.

Denver þarf hins vegar að treysta á að Golden State tapi þeim leikjum sem þeir eiga eftir til þess að taka toppsætið, en annað sætið er í höndum Nuggets og það yrði í fyrsta skipti síðan 2009 sem þeir næðu að enda tímabilið í öðru sæti.



Úrslit næturinnar:

Charlotte Hornets - Toronto Raptors 113-111

Orlando Magic - Atlanta Hawks 149-113

Washington Wizards - San Antonio Spurs 112-129

Indiana Pacers - Boston Celtics 97-117

Houston Rockets - New York Knicks 120-96

Minnesota Timberwolves - Miami Heat 111-109

Oklahoma City Thunder - Detroit Pistons 123-110

Dallas Mavericks - Memphis Grizzlies 112-122

Utah Jazz - Sacramento Kings 119-98

Phoenix Suns - New Orleans Pelicans 133-126

Denver Nuggets - Portland Trail Blazers 119-110

Golden State Warriors - Cleveland Cavaliers 120-114

LA Clippers - Los Angeles Lakers 117-122

 

NBA

Mest lesið


Fleiri fréttir

Sjá meira


×

Mest lesið