Emmsjé Gauti hannar strigaskó

Rapparinn Emmsjé Gauti hefur lengi haft mikinn áhuga á strigaskóm og eftir töluvert bras og baks er hann nú búinn að hanna sína fyrstu strigaskó og má segja að hann feti þar með í fótspor kollega síns Kanye West. Skórnir heita þó ekki Geezys. Um er að ræða Air Jordan I mid sem hann endurhannaði í þema nýjustu plötu sinnar, Fimm. Einungis eru 20 pör í boði og verður hægt að skrá sig í happdrætti á vefsíðu tískuverslunarinnar Húrra Reykjavík þar sem nokkrir heppnir verða dregnir út og fá kauprétt að skónum.

„Í raun og veru hófst þetta fyrir alveg einu og hálfu ári. Þá datt mér í hug að gera skó – upprunalega ætlaði ég að athuga hvort ég gæti fengið eitt par sem ég gæti „moddað“ og búið til Vagg og veltu skóna.“

Úr varð að Gauti fékk 20 pör af alveg hvítum Air Jordan skóm sem hann leit á sem eins konar striga sem hægt væri að mála upp á nýtt í þema Vaggs og veltu, plötu Gauta sem var þá nýlega komin út.

„Mig langaði aldrei að gera eitthvað sem einhver annar gæti alveg eins gert – ég vildi ekki tússa bara á einhverja skó. Þannig að það tók við frekar langt ferli þar sem ég labbaði á milli saumastofa og athugaði hvort það væri hægt að sauma eitthvað í skóna. Ég var alltaf að rekast á veggi vegna þess að svona skór eru tilbúin vara og mjög erfitt að gera eitthvað með þá.“

Þannig að pælingin um skóna fór á ís á meðan platan Fimm var í vinnslu. Svo þegar hún var kláruð fór Gauti hringinn hjá skósmiðum bæjarins án árangurs þangað til einn þeirra, Þráinn skóari, benti honum á ungan mann á Suðurnesjum sem væri að breyta strigaskóm. Sá heitir Helgi Líndal.

„Ég fæ samband við Helga og við setjumst niður. Ég fæ með mér Björn Geir, vin minn sem vinnur í skóbúð í San Fran­cisco og Bobby Breiðholt, hönnuð plötunnar [Fimm]. Þetta ferli tók alveg miklu lengri tíma en ég hélt að það yrði og var miklu metnaðarfyllra.“

Gauti segir að skórnir séu alveg gjörbreyttir og fyrir utan að þeir séu málaðir upp á nýtt með sérstakri skómálningu eru reimarnar breyttar, kassinn utan um skóna er sérgerður hér á Íslandi og þeir koma líka í sérsaumuðum taupoka innan í kassanum. Auk þess fylgir vínyl-útgáfa af Fimm með skónum og er því um veglegan pakka að ræða.

„Ég hringdi í Húrra og var að segja þeim aðeins frá þessu og þeir voru bara „jááá?…“ dálítið efins. Svo mætti ég með vöruna til þeirra og þá breyttist í þeim hljóðið og þeir sögðu „þetta er betra en við héldum – við vorum vissir um að þú myndir bara tússa á skóna“.“

Þannig að Húrra mun hýsa söluna á skónum og verður happdrætti um kaupréttinn, svona eins og Húrra hefur verið að gera með Yeezy-skóna hans Kanye West. Tekið verður við skráningum á vefsíðu Húrra fram að miðnætti á föstudaginn, dregið verður á laugardaginn og fólk getur náð í skóna á sunnudaginn.

Aðspurður segir Gauti að það hafi aldrei komið til greina að vera bara með gömlu góðu röðina.

„Ég skil að ungir menn geti hangið í röð með sperrtan líkama sem þolir enn kulda. En við erum auðvitað að sigla inn í harðan vetur – það var lokað í Laugardalslauginni um daginn vegna þess að það voru eldingar í henni. Ég er bara hræddur um fólk. Ég vil ekki myrða neinn.“