Rakitic frá í þrjár vikur - Ekki með á Wembley í dag

Ivan Rakitic verður fjarri góðu gamni þegar Króatar heimsækja Englendinga á Wembley í dag í lokaleik 4.riðils A-deildarinnar í Þjóðadeildinni en úrslit leiksins skera úr um hvaða lið vinnur riðilinn.

Rakitic fór meiddur af velli í 3-2 sigri Króata á Spánverjum á dögunum og ferðaðist hann ekki með króatíska landsliðinu til Englands.

Zlatko Dalic, þjálfari Króata, staðfesti þetta við blaðamenn og sagði meiðsli Rakitic líklega alvarleg.

Rakitic fór þess í stað heim til Barcelona en samkvæmt fréttum frá Spáni verður hann frá keppni næstu þrjár vikurnar hið minnsta.

Króatía þarf á sigri að halda á Wembley og mun sigur færa þeim efsta sæti riðilsins en tap og jafntefli þýða að liðið fellur úr A-deildinni. Króatar og Englendingar eru með fjögur stig, tveimur stigum minna en Spánverjar.