Guðmundur Þórarinsson skoraði sigurmark Norrköping sem vann 1-0 sigur á Brommapojkarna í sænsku úrvalsdeildinni í knattspyrnu í kvöld.
Sigurmarkið skoraði Guðmundur á 62. mínútu en hann tók frákast eftir skot David Moberg Karlsson og kom boltanum yfir línuna.
Markið er afar mikilvægt því Norrköping er í toppbaráttu sænsku úrvalsdeildarinnar. Liðið er nú í öðru sætinu og er stigi á eftir AIK sem á þó leik til góða.
Tvær umferðir eru eftir af deildinni en Kristján Flóki Finnbogason var ekki í leikmannahóp Brommapojkarna vegna meiðsla. Brommapojkarna er í næst neðsta sæti deildarinnar.
Björn Daníel Sverrisson og félagar í AGF eru úr leik úr dönsku bikarkeppninni eftir 2-1 tap gegn Næstved á útivelli en Næstved leikur í dönsku B-deildinni.
Björn Daníel spilaði allan leikinn á miðjunni hjá AGF sem komst yfir snemma leiks en tvö mörk Næstved í sitt hvorum hálfleiknum tryggðu þeim óvæntan sigur.
