Geta byrjað á þremur sigrum í fyrsta sinn síðan 2009

Þriðja umferð Domino’s-deildar karla í körfubolta hefst í kvöld með fjórum leikjum.

Njarðvík, sem hefur unnið fyrstu tvo leiki sína, fær stigalaust lið Vals í heimsókn í Ljónagryfjuna. Vinni Njarðvíkingar í kvöld verður það í fyrsta sinn frá tímabilinu 2009-10 sem liðið vinnur fyrstu þrjá deildarleiki sína. Þá vann Njarðvík fyrstu sjö leiki sína og endaði í 5. sæti efstu deildar. Liðið komst í undanúrslit þar sem það tapaði fyrir Keflavík í fjórum leikjum.

Líkt og Njarðvík hefur Tindastóll unnið fyrstu tvo leiki sína í Domino’s-deildinni. Stólarnir taka á móti Haukum í kvöld. Deildarmeistarar síðasta tímabils unnu Val í 1. umferðinni en töpuðu sannfærandi fyrir ÍR í síðustu umferð. Þriggja stiga nýting Hauka í þeim leik var aðeins 13%.

Tindastóll vann örugga sigra á Þór Þ. og Val í fyrstu tveimur deildarleikjum sínum. Stólarnir hafa haldið mótherjum sínum í aðeins 70,5 stigum og þriggja stiga nýting Þórsara og Valsmanna gegn þeim var afleit.

Í DHL-höllinni mætast Íslandsmeistarar síðustu fimm ára, KR, og Þór Þ. KR vann Skallagrím í 1. umferðinni en tapaði fyrir Keflavík í hörkuleik í síðustu umferð. Bandaríkjamaðurinn Julian Boyd fór mikinn í báðum leikjunum. Hann skoraði 37 stig gegn Borgnesingum og 31 stig gegn Keflvíkingum.

Þór hefur aftur á móti tapað báðum leikjum sínum á tímabilinu, fyrir Tindastóli og Njarðvík.

Í stórleik 3. umferðarinnar etur Grindavík kappi við Keflavík. Bæði lið eru með tvö stig eftir fyrstu tvær umferðirnar.

Grindvíkingar hafa sagt upp samningum þeirra Terrells Vinson og Michalis Liapis. Lewis Clinch hefur verið orðaður við endurkomu í gula búninginn en ekki liggur fyrir hvort hann, eða annar Bandaríkjamaður, leiki með Grindavík í kvöld.

Keflavík tapaði fyrir Njarðvík í 1. umferðinni en vann KR í síðustu viku þar sem Reggie Dupree fór mikinn á lokakaflanum.

Allir leikir kvöldsins hefjast klukkan 19.15.