Íslenski vítabaninn er með ótrúlega tölfræði

Lionel Messi er langt frá því að vera sá eini sem hefur ekki komið boltanum framhjá íslenska landsliðsmarkverðinum Hannesi Þór Halldórssyni af vítapunktinum.

Hannes varði frá Messi í leik Íslands og Argentínu á HM í dag og tryggði íslenska landsliðinu þar með jafntefli í sínum fyrsta leik á HM.

Frammistaða Hannesar hefur vakið mikla athygli enda valinn maður leiksins á flestum stöðum.

Norska blaðið Verdens Gang hefur líka tekið það saman að Hannes hefur verið algjör vítabani undanfarin ár.

Sjekk Halldorssons utrolige straffestatistikk https://t.co/QK4isQ6eBv

— VG Sporten (@vgsporten) June 16, 2018

Samkvæmt tölfræði VG þá hafa vítaskyttur klikkað á 15 af síðustu 24 vítaspyrnum á móti Hannesi.

Hannes hefur þannig varið tíu af þessum vítaspyrnum en fimm hafa farið framhjá, í stöng, framhjá eða yfir markið. Aðeins níu vítanna hafa því endað í markinu. Þetta er ótrúlega glæsileg tölfræði hjá þessum mikla vítabana.

Vítaskyttur hafa nefnilega aðeins nýtt 37,5 prósent af síðustu 24 vítum sínum á móti Hannesi.

Hannes er síðan með enn betri tölfræði á stórmótum en þar hafa vítaskytturnar aðeins nýtt 1 af 3 vítum sínum. Þar er prósentutalan því komin niður í 33 prósent.