Hérna er Nágrannaþátturinn sem þú misstir af

Á föstudaginn ráku margir áhorfendur Nágranna hér á landi upp stór augu því svo virtist sem eitthvað vantaði í söguþráðinn á þáttunum vinsælu. Kom svo í ljós að vegna mistaka hjá framleiðanda fékk Stöð 2 ekki afhentan langan „sérþátt“ sem skipti miklu máli fyrir söguþráð Nágranna.

Þátturinn er þrefaldur að lengd og má þar sjá kunnugleg andlit mæta aftur á Ramsay götu eins og til dæmis Izzi Hoyland sem leikin er af Natalie Bassingthwaight. Einnig er allavega eitt nýtt andlit kynnt til leiks, enskur ferðamaður að nafni Raphael Humphries en það er Ryan Thomas sem leikur hann og bætist þar með í Nágranna-fjölskylduna.

Þessi sérþáttur verður sýndur á morgun á Stöð 2 með íslenskum texta. Þeir aðdáendur Nágranna sem geta ekki beðið þangað til, geta horft á hann í heild sinni í spilaranum hér að neðan.