Í fangelsi vegna ferða til Rakka

Tæplega fertugur Dani, Tommy Mørck, var í rétti í Árósum dæmdur í sex mánaða óskilorðsbundið fangelsi fyrir að hafa dvalið á átakasvæði í Sýrlandi án leyfis.

Saksóknari hélt því fram að hinn dæmdi hefði frá því í nóvember 2016 fram í mars 2017 farið til Rakka-héraðs í Sýrlandi allt að 25 sinnum. Samkvæmt lögum frá því í september 2016 er dvöl á vissum átakasvæðum bönnuð. Viðurlög geta verið allt að sex ára fangelsi.

Mørck, sem hafði barist gegn Íslamska ríkinu með YPG, hersveitum Kúrda, sagði að vel gæti verið að hann hefði verið á bannsvæði, hann hefði hvorki haft landakort né staðsetningartæki með sér.