Fötin sem konur vilja klæðast

Ritstjórn skrifar 10. mars 2018 10:30

Tískuvikan í París er á enda þar sem tískuhúsin sýndu haust - og vetrarlínur sínar fyrir árið 2018. Konur, kvenleiki og föt sem konur vilja klæðast voru í aðalhlutverki hjá þessum fjórum tískuhúsum sem stóðu upp úr að mati Glamour.

Louis Vuitton

Pils, toppar yfir þunnar peysur, keðjur og falleg smáatriði einkenndu sýningu Nicolas Chesquiére fyrir franska tískuhúsið. Fatnaðurinn var aðeins kvenlegri en sumarlínan hans fyrir tískuhúsið, og engir strigaskór voru í augnsýn.

Balenciaga

Demna Gvasalia sendi konur og karla saman niður tískupallinn, í sýningu sem var ein sú besta á tískuvikunni. Hettupeysur, þröng pils og sokkastígvél eru flíkur sem hann kom í tísku, og voru þessar flíkur til staðar í vetrarlínunni. Demna hefur einnig látið í sér heyra þegar kemur að góðgerðarmálum, og gagnrýnir einnig tískuheiminn fyrir offramleiðslu fatnaðar. Vinsældir Demna munu líklega ekki dvína á næstunni, því bæði hugsun hans og hönnun er á réttum stað.

Loewe

Klæðilegar yfirhafnir voru aðalhlutverki hjá Loewe, og voru ekki meira né minna en fimmtán kápur sendar niður tískupallinn. Jonathan Anderson lagði áherslu á yfirhafnir fyrir öll tilefni, allt frá brúnum hversdagskápum yfir í svartar og dramatískari, sem hæfa fyrir kvöldin. Þessi brúna kápa væri fullkomin fyrir íslenskt veðurfar.

Paco Rabanne

Ferskleiki einkenndi fyrirsætur Paco Rabanne, þar sem þær gengu niður tískupallinn nánast ómálaðar. Flíkurnar voru mjög klæðilegar, frá silfurlituðum pilsum við prjónapeysur til ljósbleikra silkikjóla. Franskar konur voru í huga Julien Dossena við hönnun línunnar, og er þetta línan sem ætti að klæðast til að líta út eins og þær.