Kári: Erum með bestu leikmenn Íslands allra tíma í öllum stöðum

Kári Árnason, miðvörður íslenska landsliðsins, var að skiljanlega hinn kátasti eftir að Ísland tryggði sér sæti á HM í Rússlandi með sigri á Kósovó í kvöld.

„Þetta er lyginni líkast. Við kláruðum þetta sjálfir eins og við vildum gera. Við vorum í stöðu til að klára þetta sjálfir og gerðum það,“ sagði Kári sem segir þetta, að komast á HM, það stærsta á sínum ferli.

„Að sjálfsögðu. Þetta er það stærsta hjá okkur öllum, sama hvað þú heitir eða fyrir hvaða lið þúi spilar. HM er stærsta svið fótboltans og ég gæti ekki verið ánægðari.“

Kári segir að íslenska liðið hafi ekki látið staðar numið eftir EM-ævintýrið í fyrra.

„Við sýnum að þetta var ekkert „one time thing“. Við erum með bestu leikmenn Íslands allra tíma í öllum stöðum. Það er bara svo einfalt og mér er sama hvað aðrir segja. Við erum með ótrúlega sterka liðsheild og það á enginn roð í okkur,“ sagði Kári.

Ísland tapaði fyrir Finnlandi í Tampere í fjórða síðasta leik undankeppninnar en vann síðustu þrjá leikina með markatölunni 7-0.

„Þessi riðill var ekkert grín. Kósovó er t.a.m. hörkulið og sýndi það í leiknum úti og í kvöld. Finnar eru líka með sterkt lið þótt þeir hafi ekki komist í gang fyrr en í lokin. Það er ótrúlegt að hafa unnið þennan riðil,“ sagði Kári.