164 laxar á einni vakt í Ytri Rangá

Ytri Rangá er enn sem komið er aflahæsta laxveiðiá landsins og það er nokkuð víst að hún heldur því sæti á þessu tímabili.

Veiðin í ánni hefur verið fín í sumar og eru komnir um 4.800 laxar á land þegar talið var upp úr veiðibókunum í hádeginu í gær.  Þær tölur áttu eftir að snarhækka og samkvæmt okkar heimildum við bakkann í Ytri er hún að detta yfir 5.000 laxa og það gæti vel gerst á kvöldvaktinni í dag.  Frá og með seinni vaktinni í gær mátti svo einnig veiða á spún og maðk í Ytri Rangá. Allur dagurinn í gær gaf 208 laxa þar af gaf seinni parturinn 164 laxa. Eins og þekkt er, þá er alltaf handagangur í öskjunni þegar spúnninn og maðkurinn koma í ána. Má búast við að veiðitölur muni núna hækka hratt í Ytri Rangá.