Pétur Jóhann bæjarlistamaður Garðabæjar

Pétur Jóhann Sigfússon leikari, handritshöfundur og grínisti, hefur verið valinn bæjarlistamaður Garðabæjar árið 2017.

Hann hefur leikið á sviði í einleiknum Sannleikanum (2008) og verið í uppistandssýningum, nú síðast nú síðast í vor þar sem hann hefur ferðast víða um land með grínsýninguna Pétur Jóhann óheflaður.

Af kvikmyndum sem hann hefur leikið í má nefna Bjarnfreðarson þar sem hann var líka einn af handritshöfundum. Einnig var hann aukaleikari í Astrópíu og aðalleikari í Stóra planinu.

Nýjasta sjónvarpsþáttaverkefni Péturs Jóhanns er Asíski draumurinn, en frá fyrri árum má nefna Spilakvöld, Evrópska drauminn, Heimsendi, Hlemmavideo og Svínasúpuna.

Hann sló í gegn í hinum vinsælu sjónvarpsseríum Næturvaktinni, Fangavaktinni og Dagvaktinni sem einn af aðalleikurum og meðhöfundum. Í vor var hann tilnefndur til Eddu-verðlaunanna sem aukaleikari í þáttaröðinni Borgarstjórinn og árið 2008 hlaut hann Eddu-verðlaunin sem sjónvarpsmaður ársins.