Átti í mestu vandræðum með að syngja Angels í Manchester

Breski söngvarinn Robbie Williams átti í mestu vandræðum með að syngja lag sitt Angels á Etihad-vellinum í Manchester í gærkvöldi. Hugurinn hjá Williams leitaði þar óhjákvæmilega til fórnarlamba hryðjuverkaárásarinnar í Manchester þann 22. maí þar sem 22 létu lífið og tugir særðust.

Áhorfendur á vellinum hjálpuðu Williams þó að komast í gegnum lagið eins og sjá má í myndbandinu að neðan.

Robbie Williams er einn þeirra sem mun koma fram á styrktartónleikunum One Love Manchester sem fram fara á krikketvellinum Old Trafford í Manchester annað kvöld.

Þar munu einnig félagar hans í Take That stíga á stokk, Justin Bieber, Katy Perry, Miley Cyrus, Ariana Grande og fjölmargir til viðbótar.