Kyrrstaða eykur stoðverki

Haraldur Magnússon hefur alla tíð haft mikinn áhuga á líkamanum og heilsu almennt. Hann lærði einkaþjálfun og starfaði við það um tíma eða þar til hann flutti til London og hóf nám í osteópati við The British School of Osteopady fyrir um tveimur áratugum. „Þetta er fjögurra til fimm ára háskólanám sem er sérhæft í meðhöndlun á stoðkerfi líkamans. Okkar svið er því að laga vandamál tengd stoðkerfinu. Ég segi oft til einföldunar að osteópati er eins og sjúkranuddari, hnykkjari og bæklunargreinandi í einu,“ segir Haraldur sem er með eigin stofu í Reykjavík.

Fyrir stuttu hóf hann einnig störf hjá slökkviliðinu á Keflavíkurflugvelli. „Ég var í slökkviliðinu áður en ég fór í námið. Eftir að hafa unnið sem osteópati í 15 ár langaði mig líka að vinna á fjölmennari vinnustað og tek því reglulegar vaktir hjá slökkviliðinu,“ segir Haraldur kankvís.

Stoðkerfisvandmál algeng

Þegar Haraldur er spurður hver sé helsta ástæðan fyrir því að fólk leiti til hans segir hann það fyrst og fremst vegna stoðkerfisvandamála. „Margir þjást af bakmeiðslum, hálsmeiðslum, verkjum í herðum eða höfði og vöðvabólgu en þetta heyrir allt undir stoðkerfið. Osteópatar er sú stétt sem er með mörg verkfæri í sinni verkfærakistu og beitir þeim öllum á sama tíma. Hugmyndin á bak við fagið er mjög heildræn. Það er pælt í hvernig allt virkar í einu. Þegar ég meðhöndla axlarmein vinn ég líka með allt svæðið í kring til að vinna með öxlinni.“

Margir skjólstæðinga hans eru í kyrrsetuvinnu, með tilheyrandi stirðleika og oft verkjum í baki, herðum og höfði. Haraldur segir langtímasetu eða kyrrstöðu ekki góða fyrir líkamann. „Mikilvægt er að brjóta upp setur með litlum pásum. Margir vilja gleyma sér við tölvuna og sitja langtímum saman við tölvuskjáinn. Til að gera einfalt mál ekki flókið mæli ég með að fólk noti niðurteljarann í símanum sínum og láti hann hringja á hálftíma fresti, standi þá upp og hreyfi sig aðeins. Það er t.d. gott að fara að næsta vaski og fylla glas af vatni að einum þriðja, því þá hefur fólk eitthvað að gera. Svo er hægt að setjast aftur og drekka vatnið, og endurtaka leikinn á hálftíma fresti. Það þarf alls ekki að drekka allt vatnið en þetta getur verið ástæða fyrir fólk til að standa upp í smá stund,“ upplýsir Haraldur.

Sæta bragðið áunnið

Hann segir fólk geta gert ýmislegt sjálft til að halda líkamanum í góðu lagi. „Stoðkerfið er bara hluti af öllum líkamanum þannig að almennt heilbrigði er grunnurinn að góðri heilsu, bæði andlegri og líkamlegri. Varðandi stoðkerfið mæli ég með að hreyfa sig hóflega, ekki of lítið og ekki of mikið. Andleg vandamál á borð við streitu, þunglyndi og kvíða hafa líka áhrif á stoðkerfið með aukinni spennu. Þess vegna er mikilvægt að hugsa almennt um heilbrigði. Mataræðið skiptir líka miklu máli,“ segir Haraldur, sem er lítt hrifinn af sykurneyslu

„Rannsóknir á bragðskyni fólks hafa sýnt fram á að þeir sem eru vanir sætu bragði sækja í sætt. Margir sem hætta í sykri leitast eftir að fá samt sætt bragð af mat, t.d. með því að nota sætuefni. Mér finnst það röng nálgun. Þess vegna finnst mér betra að fólk venji sig smám saman af sæta bragðinu og venji bragðlaukana á eitthvað annað,“ segir Haraldur.

Ekki eitt ráð fyrir alla

Þegar hann er spurður hvernig sé best að breyta mataræðinu til betri vegar segir hann að ekkert eitt ráð virki fyrir alla. „Persónulega aðhyllist ég að taka þetta skref fyrir skref, gefa sér langan tíma og vonandi verður þá betra mataræði að lífsstíl. Sumir vilja umturna öllu í einu og það hentar einhverjum. Ég held að sú leið virki síður í það heila og betra sé að ákveða að taka t.d. einn mánuð í að koma reglu á vatnsdrykkju, næsta mánuð í að koma reglu á sykurneyslu og skoða um leið hvaða veikleika viðkomandi hefur í sambandi við sykur. Færðu þér alltaf eitthvað sætt á ákveðnum stað? Hvað er hægt að gera í staðinn?“

Haraldur segir lágkolvetnamatar­æði henta mörgum. „Margir hafa þá ímynd af slíku mataræði að viðkomandi borði bara beikon, smjör og rjóma í hvert mál. Hins vegar snýst slíkt mataræði um að minnka neyslu á einföldu, hásterkjukolvetni, eða „slæmum kolvetnum“ og borða heldur dökkt grænmeti, ber, góð prótein og góða fitu en láta „slæmu kolvetnin“ vera.“